Ua tatalaina le isi lala fou o le Ekalesia Grace Point i le pitonuu o Minchinbury i Sini, Niu Sa Uelese. O lenei aulotu ua atofaina i ai le susuga Ps Mataafa Mafi Mataafa ma le faletua ia Kalala e galulue ai.
O le lona lua ai lea o mauga tapuai o le Ekalesia Grace Point e pei ona iai lona malumalu amata i Fairfield lea o loo galulue ai le susuga i le faifeau ia Ps Vili Aufai ma le faletua ia Josie. Ma o le Aso Toonai na sei mavae atu, aso 30 Aukuso 2014 na faataunuu ai lea sauniga tāua.
Na auai foi le susuga ia Ps Tom Meredith ma le faletua ia Carol lea e faifeau i le One Community Church i Glendinning. O le susuga i le faifeau ia Ps Mataafa Mafi Mataafa na saunoa e faafeiloai ma momoli se tala o le galuega i le aofia na auai atu i le uluai sauniga muamua.
I se mau a le faifeau na ia faaalia ai, “O le tofa mamao mo le lumanai o le Ekalesia na afua mai i se miti a le faifeau ia Ps Vili Aufai ma le faletua ia ola ma tuputupu le Ekalesia mai lona malumalu muamua i Fairfield.”
“Ia lē gata ia ola le agaga o le tagata tapuai ae ia maua foi e le ekalesia le fealofani ma le tausaafia atu i soo se tagata. O le sini foi i le galuega e fia savalia i latou i maota ma laoa ia o latou toe iloa le matagofie o le alofa o le Alii ma toe uai mai ai e tapuai.”
Na sosoo ai ma le lauga autu na folafolaina lea e le Afioga i le Taitaifono Aoao o Samoa, Niu Sila ma Ausetalia o le Au Uso Kerisiano Faalevaomalo, ia Ps Lui Ponifasio na malaga mai Niu Sila ma lona faletua ia Ane Ponifasio. I lana lauga autu na molimoli foi le faafetai a le taitaifono i le vaai mamao ma le sailimalo o le auuso i Sini nei, lea ua ola ma savali le auaunaga. Sa ia saunoa foi i le matagofie o le agalelei atu i soo se tagata ma le loto alofa i le galuega a le Atua.
“O le alofa atu i ē moomia le fesoasoani ma i latou e tagi mai i se laveai, o foliga vaai lava lea o le Alii Faaola. E soo se aulotu foi e agalelei ma alofa atu e iai le faamanuiaga a le Atua.”
O lea foi aso na faauuina ai nisi o tofi tiakono o nai tina se toalua e fesoasoani atili i le galuega. Na matagofie foi viiga o le Atua na saunia e le aufaipese, autalavou ma le fanau. Na taualuga i se taumafataga mamafa na saunia lava e le Ekalesia auā Malo afifio atu aemaise le maave na auai atu faapea faaaloaloga masani.
O le susuga i le faifeau ia Mataafa Mafi Mataafa e tupuga mai afioaga o Saleaula, Avao, Fusi Saoluafata, Nofoalii ma Sagone ae o le faletua ia Kalala e afua mai i Vailoa Palauli ma Tokelau.
