Ole upu ale atunuu e masani ai e sosoo le Fau male Fau ma ole tulaga lea ua iai se tasi o tautua Samoa ua toe tatalaina i Villawood i Sini le KC Foods. O lenei auaunaga sa amata mai ele afioga Taii Mua Milford male faletua ia Ana ole Tayla’s ma ua faatauina atu nei ile susuga a Tino Brown male faletua ia Ceanna sa faafoeina le faleaiga iloga i Redbank i Kuiniselani mai le lua tausaga talu ai.
Ole Aso Toonai na faatoa toe tatala ai lenei tautua fou o taumafa ma ofu Samoa faapea galuega taulima. Na saunoa Tino Brown, “Ole agaga lava ole fia tautua mole atunuu male fiafia e gasese taumafa mo aiga, mātua male atunuu, ole mafuaaga lea ua la toe faatauina ai lenei pisinisi ma sifi mai ai i Sini e nonofo ma galulue ai.”
O kuka masani male maoi ole keke puaa male keke mamoe, panikeke, pani ma masi ua tautua atu ai nei le fale fou ua toe tatala i Villawood. Ua matauina foi ele KC le faigofie na lolofi atu o tatou tagata e faatau meaai ma oloa Samoa mai isi faleoloa a isi tagata e lē o ni Samoa, ma ose luitau lea mole auaunaga ina ia lelei, manogi, matagofie taumafa ile tofo ma ia faapea foi ona alualu i luma le lotoifale ole KC i Sini nei.
E ono aso e tatala ai ile vaiaso vaganā ai le Aso Gafua e tapuni ai. O lenei auaunaga ua avea ma vaisu a Samoa ma tagata Pasefika oloo nonofo latalata ane iai, aemaise lava Aso Sa, e tuua loa le lotu afe loa e fai ai le toonai ma maua ai foi male kopi ole Samoa Times e faitau ai i vaiaso taitasi.
Ole susuga a Tino Brown e mai le afioaga o Falefa ma ole alo o Fagalilo Etuale male tina ia Iemaima Etuale, ae ole tina ia Ceanna Brown ole alo o Tautai ma Coretti Retzlaff mai Salelologa.
