O le tasi lenei o galuega tele a le Malo o Samoa ua faaauau ona sailiili ma alu ai seleni i le tau faaleleia o le tautua lea e ala i le Eletise.
O le mafuaaga ona o le tau sailiga lava o ni auala e mafai ona faaitiitia ai le faitau miliona o tala Samoa o loo faaalu i tausaga uma ona o le suauu o loo moomia mo le gaosiga o le eletise.
O loo faaauau pea le siitaga o le tau o le suauu mai i fafo. Ua silia foi i le lima tausaga o saili Samoa e ala i le suauu popo, o le faaaogāina o le malosiaga maua mai i le lā, o le savili atoa ma le suavai ina ia gaosi ai le eletise i Samoa.
O le tele lava la o afi o loo sau ai le suavai peitai e moomia lava le suauu auā le gaosia o le eletise.
O le switchgear – o se masini ua tatala aloaia nei i le afi i Taelefaga i Fagaloa, ua faapea ona faamoemoe e tautuaina uma afi o loo i le motu o Upolu i Fagaloa e pei ona amata ai, o Lalomauga, le Loto Samasoni ma Tanugamanono.
O le masini tele lenei o le a mafai ona faaaogā ai le malosiaga o le lā e unai ai le gaosiga o le eletise i afi nei, nai i lo le faamoemoe i le suauu. O ni masini pei ni afi tetele ma o le galuega ina ia faafaigofie ai le maua pea o le eletise, ae o le a laitiiti ai le suauu e aumai mo le gaosiga o lenei malosiaga.
E 30 tausaga le umi ua faaalia e le Malosiaga tau Eletise a Samoa le EPC e mafai ona galue ai nei masini mo le gaosiga o le eletise ma na ta‘ua e le Alii Minisita o le Pulega, le Afioga Manu‘alesagalala Enokati Posala, ua mafai ai ona faasao le seleni ma le taimi alu o le EPC i lenei galuega fita o le gaosiga ma le saili o malosiaga e faafaigofie ai le maua o le eletise.
O Taelefaga i Fagaloa, lea o loo sau ai le tasi vae tolu o le eletise o loo maua i le motu lava ia o Upolu.
O le faaaliga a le Afioga i le Palemia o Samoa, le Susuga Tuilaepa Lupesoliai Sailele Malielegaoi, o le toatele lava o tagata e tele ina lē malamalama i le tele o le galuega o loo faatautaia nei e le Pulega o le Malosiaga tau Eletise aemaise foi le Pulega o le Suavai i le taumafai lea e aua lava ne‘i motusia nei auaunaga i le atunuu e ui i le tele o faigata o loo feagai ma nei Faalapotopotoga a le Malo e saili auala e mafai ai ona faaleleia atili a latou auaunaga. Ae e motusia loa nei auaunaga vave lava le faasinosinolima o le atunuu ma tolaulau le leaga o le auaunaga ae o taumafaiga o loo faia nei auā le mautinoa e faaitiitia le motusia o nei tautua ia Samoa ua vaaia ai le tele o le taimi ma tupe alu.
O se tasi la lenei o auala ua mafaufauina e le Pulega o Malosiaga tau Eletise ina ia faaleleia ai le auaunaga lenei ma ia tele se taimi e sao ai le alu atu o le eletise i maota ma laoa. O le faafetai a le Taitai o le Malo e faasaga i le afioaga o Taelefaga ona o le talia o lenei afi e faatu pea i totonu o le afioaga. O se fesoasoani tele na ta‘ua e le alii Palemia i le tau faasoasoa atu o le eletise ia Samoa atoa. O le taimi o faaaloaloga, na toe laga ai e se sui o le afioaga o Leuta Saifoloi i le malo se mataupu ua tele foi tausaga o taumafai lava e saili fofo ai.
O le afi lenei e i Taelefaga na ta‘ua e Leuta ua tele ai se faafitauli i le manogi leaga o le suavai o loo sau ai. Ua aafia ai le suavai o loo tafe tonu i le ogatotonu o le nuu ma ua vaaia le aafia o le gataifale ona o suauu ua gaosi ai le eletise ua faapea foi ona tafe atu ma isi otaota mai i le vai lea e faaaogā i le afi lea e i Taelefaga ma agai atu ai i le sami. O le faamatalaga a lea sui o le afioaga, ua tele tausaga o talosagaina se fesoasoani mai i le Malosiaga tau Eletise, e lē gata i lea a o le Matagaluega o Punaoa Faalenatura ae e lei iai lava se tali mautu ua avatu.
E malamalama le tatou ofisa i Samoa nei e iai fesoasoani tau tupe na avatu e le EPC i le afioaga e mafai ai ona faamamā ia vaitafe. O le tupe lea na tufa lava e le nuu i taimi e maua ai.
O lea la ua toe talosaga ma o le tali a le Malo i le faaiuga o le vaiaso ina ua momoli atu lea manaoga, e taatia atu se‘i toe iloilo ma vaavaai lelei i le mataupu aemaise o matagaluega e tatau ona fesoasoani atu i le fanoga o le afioaga.
O le faamatalaga a le afioaga i le tatou nusipepa, o le a faatali a siliga loa le masina e leai se tali ua toe saili sa‘o loa i se loia le mataupu. E ui i lea o le lagona lagolago o Taelefaga i le taumafaiga ina ia faaleleia le tautua o le ofo atu o le eletise i le atunuu, e tumau e pei ona o ta‘ua e sui o le afioaga.
O le galuega lava lea na tatala nei na faapea ona faapipii ai lenei masini i afi nei, na faatautaia e se kamupani a Niu Sila e igoa o le North Power ma e $5.5 miliona tala Samoa lona tau atoa.
