Ua mae‘a se tasi o galuega tele a le Malo na faagasolo i le motu tele i Salafai, i le toe fausia ma le faaleleia o le falemai tele o Malietoa Tanumafili II i Tuasivi.
O se galuega e valu masina o faatino e le konekarate a le kamupani a Ah Liki ma e $6 miliona tala Samoa lona tau atoa ma e aofia ai le toe fausia atoa o le nofoaga o gasegase tau savali (outpatients ward), o le falemai o failele, falemai fa‘inifo, potu taofia ma le tele o isi vaega ua moomia le toe faaleleia o lea falemai tele.
Faaalia e le alii Palemia, Susuga Tuilaepa Lupesoliai Sailele Malielegaoi i le tatalaga o lenei galuega tele, o fuafuaga faataatitia uma nei ua ausia e le Malo i le unaiga o le Soifua Maloloina.
Faaalia e le Palemia mo Savaii lava ia o le toatele o tagata e asia le falemai lenei e oo atu i le 40,000 le aofai, ma o Tuasivi lava e agai mai ai ona o le falemai tele lea ua agai i ai lea itu o Samoa. Faaalia e Tuilaepa o le faatupega o lenei galuega na faapea ona tutu faatasi ai le malo o Samoa, le Faletupe o le lalolagi ma le malo o Ausetalia.
O le mae‘a ai o lenei galuega tele, ua iai foi se isi galuega ua amata atu i le motu tele i Salafai lea ua agai nei i ai le malo e amata ma o le faataatiaga lea o uaea tetele o fesootaiga faatekonolosi i lalo o le sami, lea e amata atu i Savaii agai ai i Fiti ma agai atu ai i Ausetalia, Hawaii ma Amerika.
O se galuega tele lea ua amata nei ona faatu le ofisa i Samoa e auala atu ai fesootaiga ma le faatinoga atoa o lenei galuega ae o lea ua faalauiloa tauofoga i atunuu i fafo mo le kamupani o le a faatinoa le faataatiaga o nei uaea.
O se galuega tele na ta‘ua e le alii Palemia a mae‘a ona faataatia, o le a tele foi le avanoa mo tagata i le motu tele lava ia e maua ai fesootaiga televavave nei i luga o internet ma isi fesootaiga i fafo aemaise lava foi la i le falemai i Tuasivi ma isi falemai faaitumalo.
O le faatoa toe faaleleia lea o le falemai tele i Tuasivi talu ona fausia atoa ma tatala i le tausaga e 1995 lea na fausia i lalo o le fesoasoani a le malo o Iapani. O Ausetalia la lea ua tulai mai ma le faletupe o le Lalolagi auā le faafouga atoa lea ua mae‘a nei.
Faaalia e le alii Palemia i lea sauniga, e tāua tele le siisii o nofoaga faapenei mo le mamalu o le atunuu ua maua i gasegase o le tino ae e tāua atu foi le siisii atu ai ma le auaunaga a i latou o loo feagai ma le tautuaina o le atunuu i le soifua maloloina, ina ia o faatasi fale fou ma le falemai fou ma le auaunaga a fomai ma tausi soifua i totonu o Savaii.
