O le amataga o le vaiaso lenei na tatala aloaia ai se galuega tele o le toe faaleleia o le malaevaalele i Fagalii. O se galuega ua vaaia ai nei le faaopoopoga o se fale mo malo faaaloalogia e malaga mai i Samoa pe agai ese foi. O se tasi o galuega toe faaleleia o lenei malaevaalele ua tautuaina femalagaa‘iga i le va o Samoa e lua.
O se tasi foi o vaega o le galuega tele ua toe faaleleia uma ai malaevaalele i totonu o le atunuu. E lei mamao tele atu se galuega na fausia ai se nofoaga fou mo le tali ai o malo faaaloalogia le VIP Room i le malaevaalele faavaomalo i Faleolo ae o lea la ua iai nei ma se fale faapea i le malaevaalele laitiiti lea e i Fagalii. Faaalia e le alii Palemia, o le galuega lenei e $120,000 (tala Samoa) lona tau ma na ia faaalia e tāua tele lea i le feagai ai o Samoa ma le taligamalo o le SIDS ua faapea ona fau ai nofoaga faapenei i le feafioa‘i o taitai o Malo ua i Samoa pe afai e fia malaga atu i Amerika Samoa mo sina taimi a o iai i Samoa nei aemaise foi o le malaga mai ai o le toatele mai i le motu i Sasae i Samoa nei.
Ua talafeauga lava foi le tatalaga o le galuega toe faafou lenei i Fagalii ma le taunuu mai ai i le vaiaso fou o le vaalele fou a le Polenisia e tolu ai ana vaalele e faatautaia femalagaa‘iga i le va o Samoa ma Amerika Samoa.
O se faaopoopoga lenei i vaalele a le avefu‘a o le atunuu a o feagai ai ma le tautuaina tasi o atunuu e lua. O le Samoa Air ma le Interisland Airways e lē o toe feoai ni a la vaalele i le va lea o motu e lua.
