Ua silia nei i le onosefulu tausaga talu ona pueina le ata tifaga muamua i le afioaga o Matautu i Lefaga ma faaigoa o le Toe Foi i le Parataiso.
Ua tele foi ma tausaga talu ona faailoa nisi o taumafaiga e fausia ai se faletalimalo i le matafaga o le Parataiso, ae o ia fuafuaga e lei taunuu, talu ai e pei ona faaalia e le taitai o le Malo le afioga i le Palemia, o le minisita foi o tagata tafafao maimoa mai fafo, Susuga Tuilaepa Lupesoliai Sailele Malielegaoi, o ia taumafaiga uma ua ia lē manatua po ua fia, e uma ona saini le maliega ma matai o le a faatino ae oo ane i le taimi mulimuli, o matai foi ia ua toe agai atu e taofi.
O lea la faatoa taunuu le fausia o se faletalimalo i lea nofoaga tu lata i le sami ma o nisi lava o tagata faipisinisi iloga i Samoa o loo faisea i le faatuina o le atinae e 43 potu ua mae‘a ma ua tatala mo tagata tafafao e fia nonofo ai, ae e oo atu ile masina fou ua mae‘a isi potu ona ausia lea o le 60 o nofoaga e nonofo ai tulisi ma malo mai fafo.
Ua iai se fale‘aiga, o se vaitaele, ma isi lava vaega manaomia i atinae faapea. O se atinae ua faaalia e le Palemia ua toe selesele i ai le afioaga o Matautu Lefaga ona e lē gata o galuega ae o fua o faaeleeleaga e faatau atu i ai faapea ma figota ma i‘a mai lo latou gataifale.
O le fautuaga a le Palemia ua tatau ona taofi faiga a nisi o matai o nuu o le nonofo lava e leai ni mea e faia agai fau se faleoo fai ai le latou pele suipi, ona latou taofi lea o taavale a tagata e fia asiasi i se matafaga ae tapa le totogi o se tupe. Faaalia e le Palemia o se faiga sili ona matagā ma lē lelei i le atinae o tagata tafafao mai fafo.
