Ose sauniga puupuu na faia ile afioaga o Pata Falelatai ile Aso Toonai ua mavae atu nei, e tatala aoaia ai le faletalimalo ole Tua i Maauga, lea e tusa lona tau male miliona tala Samoa.
Ole afioga ile Minisita o Tagata Tafafao mai Fafao, ia Sala Fata Pinati na saunoa ile saunoaga autu e tatala ai faitotoa o lea galuega fou, ma na ia fofola atu ai se lu‘i ile aiga e ana lea faletalimalo, ina ia tulai mai lenei poloketi ise tulaga mautu male lelei, a‘o faagasolo atu i luma lana tautua.
Na ta‘ua e Sala, o soo se tautua lava e aafia ai tagata tafafao mai fafo poo turisi, e manaomia le toe foi atu o ia tagata ma avatu tala lelei e lē gata ole faletalimalo sa nonofo ai, ae o Samoa atoa. Na ia ta‘ua le tatau ile pulega ole faletalimalo ona ave le faamuamua i vaega nei: Tumamā ole aufaigaluega; Ia tausaafia ma galue faamaoni; Ia vave le tali atu i manaoga o tagata.
Na mamafa le saunoaga a lana afioga ile tulaga faamaoni o tagata faigaluega, lea na ia ta‘ua o le vaivaiga lea o nisi o tagata faigaluega, ole lima tagovale, ma ua tele le afaina o Samoa i tala ave fafo i lea tulaga. Ole isi itu leaga ole lē faamaoni o tagata faigaluega, ona e alofia ai e tagata lea faletaimalo.
Na ia faamalo ile auaiga o Sa Tologata, lea e ana lea poloketi ona ole tofa ua a‘e, e fesoasoani ai i tagata ole nuu male itumalo e ala i galuega, ae faapea le atinae ole tamaoaiga a Samoa e ala ile atinaeina o tagata tafafao mai fafo.
O lenei galuega e tusa ai male faaaliga ale sui ale aiga, ia Tologata Tile Tuimalealiifano, na faavaeaina i luga o le fia fesoasoani male fia atinaeina o tupulaga lalovaoa ale aiga. Na ia ta‘ua foi, ole auuso e toafa, e iai le loomatua e suafa ia Tuaimauga, lea e tupuga mai ai i latou lea oloo taulamua i lenei atinae.
O lenei poloketi na afua mai ina ua malaga mai le alii faifeau le Susuga ia Faee mai Ausetalia e asiasi mai i lona aiga ina ua mae‘a le afa o le 2012. Na ia vaai ai ile tulaga faaletonu ole fanua o lona aiga ina ua faaleagaina uma ile afā, ma o ina na a ‘e ai se finagalo ma amata faatalanoa loa ma isi o ona uso ma tuafafine se atinae e mafai ona fausia i luga o lea laueleele, lea la e iai le faletalimalo ole Tua i Maauga motels.
Ole tau atoa ole galuega e $1,167,000.00 lea na fausia ai potu mo aiga (family unit) e 5, ae o potu taitoatasi (single rooms) e 3. O nei potu oloo fausia i fausaga faaneionapo e aofia ai uma lava vaega eseese e moomia mo potu, ma e ea malulu (air condition) uma foi nei potu.
Ile taimi nei oloo faatau atu nei potu ile $80 ile potu mo e taitotasi ae $150 ile potu mo aiga, ma o lea tau, e na ose vaitaimi a‘o lei faia tau tumau mo nei potu. Oloo iai foi le vaitaele (swimming pool) e ui lava e tu lata le faletalimalo ile sami.
Na faaalia ele Susuga ia Faaee, e lei mae‘a le galuega ae ole faanaunautaiga o i latou e tatala lea vaega ua mae‘a ile Aso Toonai, ona e toe foi uma le latou aumalaga i Ausetalia, ae fia vaai ile tulaga ole faletalimalo ile taimi e tatala ai. Ole nofoaga poo laufanua lea ua fausia ai le faletalimalo, e iai talatuu a Samoa oloo teumalu i lea vaega o Pata, lea foi oloo maua i Pata pine faamau ole tala ia Tagaloa lea na tafea lona vaa. E tusa ai ma talatuu a Samoa, o gatai tonu ole vaega ole laufanua oloo fausia ai lea faletalimalo, oloo iai lava nofoa maa male tanoa ‘ava maa i gatai tonu o lea fanua.
Oloo iai le faamoemoe ole aiga, e toe teu faalelei lea mataaga ma faaaogā le talatuu ia Tagaloa ma lona vaa na tafea e faatosina mai ai tagata tafafao mai fafo.
