Na nuti pala ma salalau se tasi o faleoga fogafale lua o le Aoga tulagalua a Vaivase ia Tesema o le tausaga e 2012 ona o le malosi o matagi o le afa o Eveni poo cyclone Evan. Na taatiatia ai lava le faleaoga mai lena taimi a o faia galuega laveai ma saili fesoasoani le Malo o Samoa mo le toe fausia o vaega eseese o le atunuu na faatamaia i lena afā malosi.
O le 11 masina talu ona tuanai Eveni ae faatoa mae‘a le fesoasoani a le Malo o Ausetalia na toe fausia ai le faleaoga o Vaivase. O le Aso Faraile na tea nei na vaaia ai laufofoga fiafia o alii ma tamaitai faiaoga aemaise o fanau o loo aooga i le Vaivase Primary School ina ua tatala aloaia le galuega. E ui ina faapea o lea o le a lata ina tuua aoga ile tuuaga umi i le faaiuga o le tausaga, ae o lea faatoa umusa le faleaoga fou peitai o le a fetaui lelei le a‘e mai o aoga i le tausaga fou ma le ulufale o fanau i le faleaoga ua mae‘a.
O le agaga fiafia lea o le tamaitai Hai Komesina o Ausetalia i Samoa o Sue Langford ona o lea ua taulau le fesoasoani a lona Malo. E $725,700 tala Samoa na faatupe ai le galuega. O fesoasoani a Ausetalia mo mafatiaga o Samoa i le afā o Eveni na faaauala mai ai le fesoasoani mo le faleaoga mo Vaivase.
E 6.75 miliona tala tupe Ausetalia na faatupe ai fesoasoani a lea Malo mo Samoa ona o le afā o Eveni lea ua aofia ai ma le faleaoga ua umusa. O le saunoaga a le tamaitai Hai Komesina na ia sa‘afi fiafia ai i le galuega ua mae‘a ona ua toe faamanatu mai ai le afā o Tracey na taia ai Ausetalia a o itiiti le tamaitai i le taimi o aoga i se aoga tulagalua i le vaega e ta‘ua o Ausetalia o Darwin.
Fai mai Sue Langford e leai lava se eseesega o mafatiaga sa oo ia te ia i lena taimi a o laitiiti ma mafatiaga o fanau a Vaivase ina ua lafotuina le faleaoga fogafale lua e Eveni ae o lea ua toe vaaia se isi faleaoga lelei e faaaaoga e le fanau.
E ono potu aoga ua aofia i le fale fou ua tatala, faaopoopo i ai ma le sio paipa e puipuia ai le fanau mai le sitepu e agai ai i le fogafale pito i luga. Ua fausia ai foi ma ni tanevai e teu lelei ai le suavai taumafa e fuafua i taimi e faaletonu ai le suavai. O le molimau a nisi o mātua sa auai i le umusaga, ua sili ona malosi ma matagofie le galuega ua iai nei nai lo le faleaoga tuai na faaleagaina e Eveni.
