O le afioga ia Setali Satele ma le faletua ia Aolele o le faamalumaluga lea o le pisinisi, peitai o si o la alo le tamaitai ia Ruby McCarthy o loo faatautaia ma faatamoeina le “Tianas Pacific Flavaz” faatasi ai ma le fesoasoani a si ana tautoga Tivoli McCarthy, aemaise o le lagolago malosi a si ona uso ia Carol.
E pei ona lausilafia e le mamalu o Samoa o afifio i le pitonuu o Broameadows ma aai lata ane, o le fale lenei sa faaigoaina o le Immaculatas a o auauna ai nisi tamalii o le atunuu, peitai o le masina na tuanai atu na faatauina ai e le afioga a Satele ma nai ona alo, lea ua suia ai le igoa, ma ua sui ai foi ma le faatamoeina.
O ona aso ma itula tautua e mai le Aso Gafua i le Aso Toonai, i le 9 i le taeao e oo i le 8 i le afiafi, ae malolo ma faamamaluina le Aso Sapati le Aso Sa lea. Tele taumafa felanulanuai, felesi ma le manogi mo lou fofoga taumafa i aso uma, maua taumafa mo le malu o le taeao (breakie), taumafataga o le aoauli (lunch), aemaise o taumafataga mamafa o le afiafi (dinner).
E mafai foi ona latou saunia taumafa (catering) mo soo se faamoemoe o Ekalesia, faalapotopotoga, aiga ma le mamalu taitoatasi o le atunuu, e pei o faaipoipoga, aso soifua, maliu ma nisi lava faamoemoe, mo soo se aofa’i lava o le valaaulia.
O le vaiaso nei o le a amataina ai ona toe faalautele totonu o le pisinisi mo nisi o laulau ma nofoa auā taumafataga a le atunuu.
O le a suia ai foi ma se vaaiga i totonu ma fafo ane o le pisinisi. Na saunoa Ruby, e mae‘a loa tulaga ia e fia faaaulelei atili ai le tautua, ona maua ai lea o se aso o le a fai ai se aso tele, ma tatala aloaia ai le auaunaga a le “Tianas Pacific Flavaz” i lana pulega fou, ma se vaaiga fou, ae mo le taimi nei, e faaauau pea lana tautua mo le fofoga taumafa o nai ona tagata Samoa.
E mafai ona silasila ane i le facebook, pe valaau ane foi, ae o le auna lava o aute, o lou talaaao ma afio atu e te talitonu ai.
