“O le faamoemoe o le Malo ia maua nisi avanoa faigaluega mo o tatou tagata”…Tuilaepa
Ua fai si leva ona pasia e le Palemene le tulafono e avanoa ai ona faatū ma faagaioia i Samoa ni pisinisi o fale casino, ae o lea ua faatoa tatala faitotoa o se pisinisi faapea i lo tatou atunuu e pei ona uluai faatūina ma faagaioia i le faletalimalo o le Aggie Greys Resort i Mulifanua.
Manatua foi le vāvāō o manatu ma lagona faaalia o le atunuu ma ekalesia kerisiano ina ua faailoa e le Malo lenei fuafuaga lea sa faamatalaina ai e le fono a ekalesia o se taumafaiga a le Malo o le a faatuputeleina ai le agasala ma aafia ai o tatou tatou tagata i soligatulafono eseese.
Peitai ua faailoa e le afioga i le Palemia i se feiloaiga masani ma tusitala i le Aso Tofi ua mavae, o le faamoemoe o le Malo ia maua ni avanoa faigaluega mo o tatou tagata. E toa selau tagata o le a faigaluega i le fale casino ua tatalaina nei e pei ona faailoa e le Palemia. O se itu lelei lea i le toatele o tagata aemaise fanau ua iu aoga o loo saili ni galuega.
O le fale casino i Mulifanua na tatala i le Aso Toonai na tea nei ma ua fetaui lelei le faamoemoe ma le tumutumu ai o le atunuu i usugafono mai atunuu eseese o le lalolagi, o loo auai i le fono a atunuu laiti tau atiae a Malo Aufaatasi o loo faagasolo i le vaiaso nei.
O aiaiga o le tulafono o fale casino ua na o tagata ai mai fafo e lē o ni tagatānuu o Samoa e mafai ona ulufale ma taaalo i casino, ae lēe mafai ese tagata Samoa ona ulufale iai. Ua nao tagata foi e umia tusifolau o isi atunuu e mafai ona taaalo ai. Peitai o le a mafai foi e isi o tatou tagata o loo umia tulaga tagatanuu o isi atunuu e pei o Niusila ma Ausetalia o loo umia tusifolau o ia atunuu ona ulufale iai.
O le faatuina o lenei foi taumafaiga sa faapea ona faamatuu atu ai e le malo ni laisene se tolu moni pisinisi na talia a latou talosaga e faafoe ai fale casino. Peitai na alu alu ae toe faaui i tua le laisene o se pisinisi mai Saina ona o ni faaletonu sa aafia ai lea pisinisi, totoe ai na o laisene e lua lea sa umia e le faletalimalo o Aggies Resort ua tatalaina lana taumafaiga.
O loo iai le talitonuga o nisi e iai lava le taimi e faataga ai o tatou tagatānuu ona ulufale ma taaalo i taaloga i totonu o casino, ae o se lasaga e ono tupu i ni tausaga o lumanai pe afai o le a umi pea o sologa lelei lenei taumafaiga ma leai ni soligatulafono e tutupu ma aliali mai e aafia ai o tatou tagata ona o fale casino.
O atugaluga ia o loo faaleo pea e nisi ua lava lo latou silafia i auga o nei ituaiga o pisinisi ona o mea ua tutupu i nisi atunuu o le lalolagi o loo mafiafia ai pisinisi fale casino. O le mau tauave a le Malo o seleni uma e maua mai i pasene o tupe e sasaa atu i nei pisinisi o le a tuuina atu i le pulega o taaloga petipetiga a Samoa e toe manuia ai o tatou tagata i le atinae o taaloga.
O seleni e maua ai o le a faaleleia ai le atinae o taaloga ma tauia ai foi alo ma fanau a Samoa o le a maualuga ma tauleleia ai le igoa o le atunuu ia latou taumafaiga i soo se taaloga.
