O le 7 ai nei o tausaga talu ona faagasolo le 13 Aso a le Ekalesia i Puaseisei i Magele Sasa‘e i lalo o le taitaiga a le susuga a le faafeagaiga ia Rev Victor Pouesi ma le faletua ia Salome, ae o le taimi muamua lenei ua tupu ai se vaaiga uigaese i totonu o le 13 Aso, i se Ekalesia e faafiafia ae lua ni togiga e fesuisuiai i le taimi e tasi.
O le ekalesia EFKS i Weymouth o loo galulue ai le toeaina o le pulega a Manurewa ia Rev Siloa Lologa ma le faletua ia Lotofoa, na latou tatalaina pesepesega ma faafiafiaga o le 13 Aso o lenei tausaga, i le afiafi o le Aso Sa, 6 o Novema.
E ese foi le molimau i le faatumulia o le malumalu o le Ekalesia o le EFKS i Puaseisei i le mamalu o le atunuu na agai atu e molimauina le tatala aloaia ai o le 13 Aso. Na faapea foi ona auai atu ai ma pule o kamupani o loo latou lagolagina lenei faamoemoe le susuga ia Faimalo Allan Stowers o le pule o le Pacific Ezy Money Transfer ma le susuga ia Shiu Singh o le Henderson Cars, faatasi ai ma susuga i aoao o le kolisi o Malua sa molimauina faatasi lenei polokalame.
Na saunoa le susuga i le faafeagaiga ia Rev Victor Pouesi e faafeiloai le mamalu o le atunuu, ona tatalo lea o le susuga le toeaina ia Rev Siloa Lologa e amata aloaia le polokalame, faatasi ai ma lana upu faamalosi e amata mea ai le faagasoloina o le faamoemoe o lenei tausaga.
Saunoa le susuga le toeaina, “O le pule faatupu a Iesu e pule aoao i mea uma, ma ia avea o tatou loto ma aiga ma fale na soifua mai ai le pepe o le Kirisimasi.” I le matagofie o le apoapoai a le toeaina, na momoli faaatasi ai le feau o le Kirisimasi ma pesepesega a le Ekalesia e pei ona iai lo latou sao i le faamoemoe.
Ae lē gata i lea o tala faatino na tapenaina e faatatau lava i le auga ma le autu o lenei vaitaimi. Ae o le vaega na pito sili ona faateia ai le maimoa a tagata o le fesuiaiga o togiga a le aufaipese, ma le suiga o ta piano e toatolu, i le taimi a o vevesi le faagasoloina o le polokalame i totonu o le itula e tasi, ma o se taimi muamua lea ua tupu ai se vaaiga faapea talu ona faatino mai le 13 Aso lea na saunoa lava i ai le susuga i le faafeagaiga ia Rev Victor Pouesi.
Na taualuga le sao o le Ekalesia i le latou pese faamanuia o le Kirisimasi ma le tausaga fou faatasi ai ma le tatalo faamanuia a le toeaina ia Rev Siloa Lologa ina ia ulimasao le faagasoloina o le faamoemoe a le Puaseisei i Magele.
Sa faaiu i le felosipi faatasi o tagata uma ma fai le iputi auā o le tasi lea sini autu o le 13 Aso e mafuta ai tagata ma fiafia i le fanau mai o le pepe fou. Ma sosoo ai loa ma le agai uma i luma o le malumalu e molimau faatasi le faaolaina o moli o le falesa lea sa ki e le faletua ia Lotofoa moli uma.
O nisi o aulotu o le a iai lo latou sao
O le matagofie ma le maualuga o le 13 aso o le molimau faafofoga a le atunuu e lē o mafai ona auai faatasi ai ma i latou, ae o loo faafofoga i luga o leitio ma le upega tafailagi a o tuusa‘o atu i faasalalauga a le Radio Samoa i afiafi taitasi, e tauala mai le lagolago a nisi o kamupani e pei o le Pacific Ezy Money Transfer, Henderson Cars, G-Mana Wholesale Autos Ltd ma le Cool Gadgets Ltd.
