E sui a tausaga ae lē taitai ona uma le fia faafofoga o le toatele i fatuga a tama tuai i le musika e pei o se tasi o tamalii o le atunuu, le susuga ia Tolumaanave Misiluki Su‘a.
Ua leva foi ona tatali le taunuu mai o le CD Vol 2 o le “Vaa o Noa” auā o fatufatuga ma upu o pese e ono maua ai se vailaau mālū i le faafofoga a nisi tagata. O le po o le Aso Toonai 7 o Novema sa tatalaina ai lena CD Vol 2 o le Vaa o Noa a le susuga ia Tolumaanavae Misiluki Su‘a.
Na faatumulia i le atunuu ia i latou sa malaga atu e faatau le CD lea na faapa‘ū i le $10.00, na o le tasi le po aemaise le au eva se‘i fai se faamalositino. Na toe usuina e Tolumaanave nisi o ana pese tuai e lē mavae lava le logomalie e lē suia.
O le fofoga o le po, o le tofa ia Patea Pesamino Taefu mai Falelatai. Sa auai foi le susuga ia Seiuli Pesa Ilimaleota o se uso tuofe foi o le susuga ia Tolumaanave i tulaga tau musika na lagona ai foi le fiafia o le tama pese.
Na toe taliu atu le susuga ia Tolumaave Misiluki Su‘a i Aotearoa i le Aso Lulu auā foi le auina atu o lana Vol 2 o le Vaa o Noa ma agai atu ai loa i Samoa. Na faafetaia e le fofoga o le Po le tofa ia Patea le aofia ona o latou aao foai ma le mafuta atu ua maualuga ai le po atoa.
Saunoa faafetai Tolumaanave e tauala atu i le Samoa Times e momoli lona agaga faafetai ia Samoa uma o loo fiafia e faafofoga i ana fatuga aemaise i latou sa auai i le tatalaina o lana Vol 2 i lana CD o le “Vaa o Noa”.
