O le aafia o ni tagata poo ni faalapotopotoga, ni pisinisi ma ni kamupani i ni feseeseaiga sa tasi lava le nofoaga sa sulufai i ai ni itu e aafia i ia feseeseaiga mo le sailia o se faaiuga o le faamasinoga. Peitai o lea ua amata faaaogā nei se isi tautua fou ua ta‘ua o Tufuga o Faatofala‘iga poo mediation, lea e muamua soalaupule ai ni mataupu e saili ai se fofo e malilie uma i ai, e aunoa ma le muamua tagofia i ala o le tulafono i le faamasinoga.
O se faiga na faaalia e le Pelesetene o le Faalapotopotoga o Tufuga o Faatofalaiga le afioga i le tamaitai Loia, Maiava Visekota Peteru, e sili ona maua ai le avanoa o ni itu e faatalatalanoa ai se mataupu ma fausia ai se maliliega e taunuu i ai. O faaiuga la e ausia pe a mae‘a se faatalanoaga ua faatulafonoina lona malosi e pei o faaiuga a le faamasinoga, ae o le itu sili ona lelei mo le atunuu, e lē totogia.
E 42 i latou ua maua le tomai aoaoina e faia ai lenei galuega ma ua ta‘ua foi o Tufuga o Faatofalaiga poo mediators. O nisi o loia, o nisi o faafeagaiga ma faletua o faifeau, a o nisi foi e iai o latou tomai i pisinisi ma isi tomai faapitoa. O lea la ua iai lo latou ofisa fou i le maota faamasino i Mulinuu mo le faato‘ai i ai o se talosaga a ni tagata e fia manaomia lea auaunaga fou. Faaalia e le pelesetene, ua iai foi le aiaiga o soo se feseeseaiga e taunuu i le faamasinoga, o le a muamua ona faatalatalanoa i lea auaunaga e saili muamua ai se maliliega o se mataupu ua eseese ai ni itu.
Peitai afai e lē manuia ma maua se maliega e avea o se faaiuga o se mataupu, o le aiā tatau lea a se itu poo se tagata ua lē faamalieina i se taumafaiga a Tufuga o Faatofalaiga, o le ave loa i le faamasinoga. O mataupu e mafai ona ave i lea tautua fou, o ni feseeseaiga i ni mataupu e pei o se aitalafu ua lē totogia, lavea le taavale ae manao le isi itu e totogi atu se tupe e faaleleia ai lana taavale, se eseesega i ni tagata o se aiga i ni tulaga tau meatotino poo aseta, ma isi lava mau mataupu faapena.
E lē faatalanoaina ai ni mataupu tau solitulafono ona o ia mataupu e nafa ma le faamasinoga. O le tatalaina o lona ofisa i le faaiuga o le vaiaso ua mavae ua avanoa ai le atunuu ma soo se tasi e saili se fesoasoani a Tufuga o Faatofala‘iga auā e faia fua e aunoa ma se totogi. E iai le talitonuga o se isi lea faamāmā avega mo le atunuu mai le tele o seleni e totogi ai ni loia e finauina se feseeseaiga. Ua iai aiaiga o le auaunaga e pei ona faaalia e le Pelesetene, a taunuu se feseeseaiga i se faaiuga ua tau fai malilie uma i ai ni itu, e tatau ona usitaia.
O le isi itu tāua i mataupu e tagofia e lea tautua fou, o le lē faailoaina lea i se tulaga lautele ona e confidential mea uma pe natia ua na o i latou lava e aafia latou te silafia. Ua na o latou foi e auai i se faatalatalanoaga e lē pei o le faamasinoga e avanoa ona faasalalau e le aufaasalalau ma tusitala seia vaganā ua iai se poloaiga a le faamasinoga e tapu ai ona faasalalau.
