Tatala auala e fā i Savaii

O afioaga o Salelavalu, Saleaula, Pu‘apu‘a ma Sagone na afea e le Malo i le faaiuga o le vaiaso mo le tatala aloaia o o latou auala ua mae‘a fausia.

O ni galuega nei ua aofia i auala e 30 ua mae‘a pasia e le Malo i ana fuafuaga alualu mamao mo le fausia i totonu o le lima tausaga o le paeaiga o iai nei.

O le faamatalaga a le alii Palemia o le fuafuaga ua iai nei ia mae‘a le tausaga lenei ua mae‘a uma auala e 30 e pei ona mae‘a ona pasia.

Faaalia e le Alii Palemia o le tau atoa o galuega e fā na molimauina i le motu tele i Salafai e $3 miliona tala. O auala nei, e lua auala galue ma isi auala e lua o ala tetele. O le fautuaga a le Alii Palemia i afioaga ina ua tatala nei atinae o le faaaogā tatau o avanoa ua maua e ala i le faaleleia o femalagaaiga i nuu a uta.

O le fua o le aogā o nei galuega na ta‘ua e le Alii Palemia e maua mai i le maketi tele i Salelologa. Faaalia e le alii Palemia na agai e asiasi i le maketi ma vaaia ai le tele o laulau piliati ma le ‘ava Samoa e na o le tumu ai o le toatele e lē o iai ma se feau o faia ae na o le saofafai i le ‘ava Samoa i le aso atoa.

Ta‘ua e le taitai o le Malo o le faafitauli lea ma atonu o le a avea le tatala o auala nei o le a avea ma auala o le a agai ai e atiae maumaga ma isi atinae ma atonu o le a faaaogā ai avanoa o le maketi o loo tumu i laulau ma poloka ua faatau ai oloa mai i Saina ae ua lē tele ni fua o faaeleeleaga o vaaia ai.

Faaalia foi i le Palemene e le Minisita o Galuega i totonu o le Palemene, e tele lava talosaga o loo iai ae o le fuafuaga e oo atu lava le fesoasoani. Peitai e lē o lava se seleni e fai ai galuega i le taimi e tasi ma na o le talosaga ua tuu atu e le Afioga Manu‘alesagaala Enokati Posala i faipule o le Maota ina ia maua le onosai a o tau faasoa atu galuega ua talosagaina e nisi o itumalo.

Ona pau isi galuega tetele ia ua faapea ona taulai i ai i le lumanai lata mai o le auala lea e agai atu i Faleata seia oo i le uafu i Mulifanua, o se galuega ua tele tausaga o faagasolo ma ua faatupe e le Faletupe o le lalolagi le taumafaiga lea ona o se atinae ua faia e tali atu ai i suiga ogaoga o le tau.

O isi auala na faapea ona tatala i le masina lava lenei e aofia ai le auala tele fou i Aleipata atoa ai le auala i Tiavea-tai.

Tatalga o le auala (photos by: Government of Samoa Facebook page) Tatalga o le auala (photos by: Government of Samoa Facebook page)