Na saunoa manino Daniel Afoa i le faamatalaga o lona faanaunauga e tusa ma le faamoemoe ua taunuu ma ua faatinoina lava i lo la maota e pei ona sa i ai le faalauiloaina ma le faapaiaina o le la pisinisi fou lea ua faamautuina nei ma tatala aloaia i le Aso Toonai ua mavae atu nei 15 o Aukuso.
O le susuga ia Daniel Afoa o se tusiata o fale (architecture), ma sa galue faa-tusiata i ni tausaga se tele seia oo ina faamavae mai i le kamupani sa galue ai ma amata loa ona faagaioi lona faamoemoe i le faia lea o sana lava pisinisi ma lona faanaunautaiga ia mafai ona fesoasoani atu ai i tagata lautele aemaise lava i ona tagata Samoa ma le Pasefika.
Na faailoa mai e Afoa, o ia o se tasi o le au tusiata sa i ai i le faavaeina mai o le taulaga faatau tele a Manukau ua faaigoaina nei o Westfield Mall.
Na iloga foi lona tomai ma lana lagolago i sona sao faatusiata i le tusiina o le ata mo lea taulaga faatau, ma o se luitau foi mo ia lea galuega ma amata faamautu mai ai lava lona lagona ina ia mafai ona faataunuuina lana moemitiga pei ona ua i ai nei.
Na saunoa Daniel e lei faigofie lona taumafai aua e lei puupuu se taimi na tapenaina ai.
I lana saunoaga, tautino o ia, o le lava o le onosai ma le tuuina atoa o le faamoemoe i le Atua ma lana faasinomaga, ua tau lau ai le faamoemoe, ua moni ai upu o le atunuu, “Ua tinipao nei le uto e pei o le faiva i vai”, ae o le mau foi a le tusi, “O le faamoemoe ua taunuu o le laau lea o le soifua”.
Ua amataina nei auaunaga a le alii tusi ata o fale i lana kamupani foi le AA Design & Building Ltd ma le faamoemoe ia aoga lona tomai mo le mamalu o le atunuu.
I se mataaga a le tusitala a le Samoa Times, e maeu foi le tomai o lenei alii, aua o tua o lona maota ua fausiaina ai se faleoo, e malolo i ai i taimi o le taumafanafanama.
Na faatumulia le faamoemoe i nisi o le mamalu o le atunuu na auai e molimauina le tatalaina aloaia o le pisinisi a nei alo o Samoa. Faaalia ai o la lagona fiafia ma lona faletua, faafetaia ai le susuga i le alii faipule, Sua William Sio e tusa ma lona taimi na faaavanoa e auai atu ai i lo la faamoemoe, maualuga ai foi lea po ona o le agaga lagolago atu.
