Ole saoasaoa male televavave o auala o fesootaiga faaneionapo poo le faatekonolosi, ua ausia ai e nisi o tamalii ole atunuu se laasaga fou e faafaigofie ai e tupulaga talavou aemaise o tamalii faiupu ole atunuu ona saili ma maua faalupega o afioaga i luga o polokalame (App) i upega tafailagi ma ua faaigoaina o Measina.
E lua tausaga talu ona fuafua ma tapena mai e nei tamalii ole atunuu lenei faamoemoe le susuga ia Niko Toluono male susuga ia Mosotele Setatara Efaraimo, seia oo lava ina tatala aloaia lo laua faamoemoe ile afiafi ole Aso Lulu ua mavae, 31 o Aokuso ile Pacific Business Trust i Otahuhu.
Ose po na matuā iloga ona faatumulia ile paia male mamalu o Samoa potopoto aemaise o uo ma ē masani faapea aiga sa autovaa atu e molimauina lenei taumafaiga fou ua mafai ona ausia e nei tamalii ole atunuu.
Ole susuga ia Tauanuu Sealiimalietoa Perenise Tapu sa fai ma fofoga ole po e faafeiloaia le mamalu ole atunuu ma faasoasoaina taualumaga ole polokalame, ae ole Misionare ia Samuelu Lafolua na ia tatalaina le faamoemoe ile sauniga lotu.
Ole lauga autu o lea afiafi na saunoa iai le Konesula o Samoa ia Faolotoi Reupena Pogi, lea na ia faataoto ai se fesili e faapea: Ole ā le tāua o Measina a Samoa? Ae na toe tali le Konesula, o Measina a Samoa, o lana aganuu, o lea aganuu oloo aofia ai vaega eseese ole soifuaga faa-Samoa e pei o nei, ole gagana faalauaitele, gagana faamatai, gagana faafailauga, o alagaupu, o muagagana, o tu ma aga, o siva ma pese.
Na faamanino foi ile saunoaga ale Konesula le faiga ole siva faasamoa, ole sisiva lea ole ausiva ma pepese ae lē ole ta ole CD pese. Ma o iina e iloa ai le tāua ole siva faasamoa moni male aulelei o tamaitai Samoa e faatinoina lea vaega o measina ale atunuu.
O nisi o measina, o ietoga, ole falelalaga, faalelega pepe, o faaulufalega o taalolo, leulumoega ole teine faaipoipo, faafailelegatama, o mea uma ia e tupuga mai ile ietoga.
O taligamalo, ‘ava ole feiloaiga, sufiava, folafola ‘ava, palu‘ava, tufa‘ava, tautu‘ava, o ai e ‘ava mua, a‘o ai foi e moto iai le ‘ava, faapea foi gafa, o talatuu ma talafaasolopito ale tatou atunuu, o faalupega o nuu ma isi vaega eseese.
O nisi ia vaega ole tatou atunuu e ese mai ai Samoa mai atunuu uma ole lalolagi auā ole fatu ole aganuu a Samoa o lana gagana male faamatai. Ua maitauina foi le tele o nisi o alo ma tamafanau o Samoa oloo i Niu Sila nei ua faaee iai e o latou aiga le suafa matai, aepeitai e faigata ona faatino lo latou tiute faamatai, e faigata foi ona latou iloa le tāua male felanulanuai ole tatou aganuu pe a lē lelei le tautala faasamoa.
Ole faavae o Samoa e faavae i lana aganuu ma lana faakerisiano, auā ole faakerisiano e maua mai ai le loto maualalo, loto faamagalo, loto faapalepale, onosai, fealofani male loto alofa, ole aganuu e maua mai ai le faaaloalo, tautua, feavatai, fetausiai felagolagomai male loto alofa auā ole Faasamoa e auau mea uma ile alofa, e amata ile alofa ma faaiu ile alofa mea uma.
O nisi o lauga ole afiafi, na saunoa iai le susuga ia Tafaese Siliga Setoga (Artist – Popo Hardware) faapea Dr Fuafiva Faalau (Lecture Massey University).
Ole susuga ia Niko Toluono na faamalamalamaina le uiga ole faaamoemoe i lea po, poo le Mesina, ae ole tofa ia Mosotele Setatara Efaraimo na fai ma sui ole laua vaaseelua ma Niko e momolia le agaga faafetai ile paia male mamalu ole atunuu sa autovaa atu e lagoalgo lo laua faamoemoe ua mauluga ma matagofie ai lea po.
O upu tomuli na saunoa iai le fofoga ole polokalame ia Tauanuu e faamatafi ai le afiafi ma momoli ai nai mealofa tupe mole Misionare na saunia le lotu faapea i lauga autu ole po ma faaiu ai loa ile taumafataga na saunia ele faleaiga ole Talimanao.
