E pei o ni ufi e tutupu pea i tino, ma ua lē mafai e upu ma tala ona natia lagona fiafia o le afioga ia Tofaeono Misatauveve Joseph Holywood ona ua tau lau o le faamoemoe sa fauao faupo e pei ona timu‘ia ma laina ai i le tele o tausaga, lenei ua iu manuia.
Na pei o se aso ua toe lagi lelei i ni timuga tetele sa ufitia ai atumauga ina ua feiloai ma malo faaaloalogia aemaise le tamā o le atunuu, le afioga i le Alii Palemia.
O se aso na mafai ona tata‘i maia finagalo ma agaga o le paia ma le mamalu o Samoa uma i Kuiniselani, Sini ma nisi mai Melepone e molimauina lea umusaga tāua, e pei ona tatalaina i le Aso Toonai, aso 11 o Iuni.
Na tūtūlalai faaaloalo le auvalaaulia a o agai atu i totonu le afioga i le Palemia ma lana Masiofo faapea le aumalaga ma le Mayor a Logan City, faapea le Hai-Komesina o Samoa i Ausetalia, le afioga ia Lemalu Samau Tate Simi.
Na lagiina vii e lua o Samoa ma Ausetalia ma ua mamalu ai le talāluma ma le maota atoa o le Beenleigh Event Centre ina ua fesagai sega‘ula.
Na mamalu lava le aso i le faamalumaluga a Susuga i Ao o Faalupega e faamata e fia ma faletua sa auai faapea le afioga ia Patele Epati Tamati sa ia momoli laau i fogaa.
Sa faafeiloaia faapitoa Lana Afioga ma le Masiofo faapea le auvalaaulia e le Fofoga o le po, Peresitene o le Mafutaga a le Leo o Tagata Samoa, le afioga ia Faimalotoa Ioane Pale.
O le upu tomua o le Tusi na saunoa i ai le alii Palemia ma ia momoli ai le faamalo i le afioga ia Tofaeono Joseph Holywood e tusa ai ma le sogasoga ma le lototele ua tini ai lau o le faamoemoe.
Na saunoga faafetai Tofaeono, e faaleo lona agaga faagaeetia ona o le talisapaia e le atunuu faapea malo faaaloalogia o lona faamoemoe.
O faaaloaloaga ma le alofa foai sa faaalia i lea po ua lē ‘ole lava lea ona ua mafai ona fesilafai fiafia i luma o nuu ae lē o tua o nuu.
Na tasi moemoe le futia ma le umele o le aumalaga e avea le fetalaiga ia Tolofuaivalelei Leiataua Falemoe e momoli so latou agaga faafetai mo tapenaga ma faaaloaloga uma ma le matagofie o le feiloaiga.
O faaaloaloga a le paia o aiga o le afioga ia Tofaeono J Holywood mo le aumalaga, sa fai ai ma sui le tofa ia Patea Taefu Pesamino e feagai ma faaaloaloga ma se upu a o lei tuumuli le tamā o le atunuu ma le aumalaga.
Na matuai laulelei ma malilie le auvalaaulia i le taumafataga na saunia e le Uncle Sams Catering, Poulava ma Lorna Matautia.
O le susuga i le Toeaina Taitai o le pulega EFKS a Saute, Rev Tauaaga Mataafa sa tatalo faaiu a o lei ta‘ape le fuamanusina ma tuuvaa atu le faigamalaga mamalu.
O le toatele o le aofia sa molimauina le matagofie puupuu suamalie o le po auā na malupuipuia ma saogalemu fuafuaga uma leai ma se vevesi.
