Taso‘a e Le Pasi nai alii Farani i le ma‘ema‘eā o Savea

Julian Savea i se tasi o ana sikoa e tolu i le taaloga ma Farani
Julian Savea i se tasi o ana sikoa e tolu i le taaloga ma Farani

(All Blacks 62-13 Farani)

Na faatoa tepa lea o le Ipu o le lalolagi i le malosi siitia faaopoopo o le Olopeleki i la latou lami mataina i le taaloga pa‘ū ma nofo i le Aso Sa i ‘ai 62-13 ma taai ai fala o Farani.

O le alo iloga o Samoa ia Julian ‘The Bus’ Savea na mataina lana taalo ma sikoa faatolu i lea taaloga ma toe vaaia ai uiga sauā o le tamoe a Jonah Lomu.

Sa faapea nisi o nana se auupega a Farani mo le taaloga lenei ae na faaopoopo i ai sikoa e lua a Tawera Kerr Barlow ma atili mafatia ai i le Olopeleki.

O le manumalo a Niu Sila atonu na suia ai mafaufauga o ‘au a Argentina ma Sikotilani lea na siitia ai foi a latou taaloga pa‘ū ma nofo.

O le alo foi o Samoa ia Jerome Kaino le numera ono na laasia le tulimanu mo se sikoa matagofie lea na amata mai tua o le luasefululua i se osofaiga umi a Farani ae peitai na lē iloa atu le polo ma taliu mai ai Niu Sila.

Na tatala foi ogaumu a le foueki ia Kieran Read i se pasipasiga a le laina i luma ma sikoa ai i lalo o le pou.

Na vaaia foi le feai o le uigi puupuu saoasaoa ia Nehe Milner-Skudder i se sikoa i le uigi ma Brodie Retallick le loka malosi a Niu Sila. E fitu sikoa na ova a Dan Carter ma se sala ae o Farani e tasi la latou sikoa mai ia Louis Picamoles lea na tuli i tua mo le sefulu minute. Na ova le sikoa na kiki e Morgan Parra faapea se sala ma le isi na kiki e Scott Spedding mo ‘ai faaiu a Niu Sila 62-13 Farani.

Ae peitai o le sikoa faatolu o Julian ‘The Bus’ Savea ua silasila ai le lalolagi i le malosi o lenei alo o Samoa sa tamoe faasoloatoa i luga o tama taalo a Farani e toatolu a o agai atu i le laina sikoa.

E moni ai upu a tamaiti, e pei lava e lavea i le pasi le ‘au a Farani ma ua sauni nei le Olopeleki e fetaui ma Argentina i le semi-final.

Niu Sila 62 (Julian Savea 3, Tawera Kerr-Barlow 2, Jerome Kaino, Kerian Reid, Brodie Retallick, Nehe Milner-Skudder tries; Dan Carter 7 sala, penalty) manumalo ia Farani 13 (Louis Picamoles sikoa; Morgan Parra sala; Morgan Parra, Scott Spedding sala)