Tasi le vaiaso, tapena ese ai Vaiotu Siafausa ma lona aiga

E talitonu le to’atele na auai i le lauina o le faai’uga a le faamasinoga o Fanua ma Suafa i le mataupu i le va o Alii ma Faipule o Vaimoso ma le tofa Vaiotu Mulitalo Siafausa Vui, o le faai’uga ua taunuu iai le mataupu ina ua ave i le tulafono le faatula’ieseina o Vaiotu Siafausa, o lona tausi ma ona alo, ua maua le filemu o finagalo o le nuu. O le aso Faraile 3 o Aperila 2009 na aumai ai le faai’uga o lenei mataupu ma ua poloa’ina ai e le faamasinoga Vaiotu Siafausa o lona tausi ma ona alo e tula’i ese ma le afio’aga, i totonu o le vaiaso e tasi. O lona uiga ua manumalo le faai’uga a le nuu, e tuua e Vaiotu Siafausa Vui ma lona aiga eleele o Vaimoso, peitai o le talosaga a le faamasinoga i Alii ma Faipule o le afio’aga e le po pea se nuu.
O le faaiuga a le faamasinoga ua faaamaonia ai vaega autu o le talosaga a Alii ma Faipule i le solia lea e Vaiotu Siafausa Vui, o nisi o aulape o le nuu na mafua ai ona faate’aina ma le faiganuu lea ua sefulu tasi nei tausaga oi tua le aiga o Vaiotu ma Melei ma le faiganuu. O le faatulaieseina o se tasi poo se aiga e ala i le tu o le to’oto’o o se aga masani lea i tu ma aganuu a Samoa e puipuia ai ni tulaga ma’ale’ale e tula’i mai, ma tausia ai le filemu i le nofo lelei o tagata. Ua faigata i le faamasinoga ona talia se vaega o le talosaga a le nuu e faapea ua iai le faavae tau faasalaga o Vaimoso, o le mea ua iai le finagalo o le Igoamatua (Une ma Manuleleua) ma isi matai o le i’uga lea e usita’ia.
Ua faamaonia le talosaga a Alii ma Faipule i lona vaega, 1,2,3,4 ma ua poloai’ina Vaiotu Siafausa Vui, o lona tausi ma ona alo e tula’i ese loa ma le nuu, ma ia faatinoina lea i totonu o le vaiaso e tasi. Peitai ua fautua le faamasinoga i le pule mamalu a le afio’aga e tusa o lo latou finagalo faaalia, e le po pea se nuu. Na matua leai se ofi o le maota faamasino autu i Mulinuu i le to’atele o le afio’aga o Vaimoso na auai, aemaise o nisi o matai fai’upu o le itumalo o Faleata na tapua’ia se faai’uga a le fa’amasinoga. Na molimauina foi le to’atele o le vasega o leoleo na puipuia le filemu o le faamasinoga ao talia le faaiuga seia oo ina ma’ea ona fofogaina le taunuuga o le mataupu a le afio’aga.
E lei finagalo le tofa Vaiotu Siafausa Vui e faia sona finagalo ina ua fesiligia e tusitala i le ma’ea o le faamasinoga, ae mo le itu a le nuu ua faafetaia e le tofa Une Kelekolio le faaiuga ua aumai i lona talitonuga maumaututu o se faai’uga e maua ai le to’afilemu o le afio’aga. Mo le faaiuga ua faia e le faamasinoga ua lagolagoina ai le mau a Alii ma Faipule o Vaimoso e faatulai ese Vaiotu Siafausa ma lona aiga, ua faamanino atili i le faaiuga na fofogaina e le sui Pelesetene le afioga Fuimaono Nonu Vaoutumala, o le a le aiaina i le faaiuga le aia saoloto o i latou ua faasalaina e asiasi atu ai i lo latou aiga ma lona fale e pei ona aumai ise faaiuga a le faamasinoga o Talosaga Apili (Court of Appeal) ise tasi o faamasinoga na faatulai ese ai se tasi o aiga. O loo aiaia ile vaega 13 o le Faavae o le Malo Tuto’atasi o Samoa le aia tatau saoloto o soo se tagata e faasino i lona fanua, lona fale ma ana meatotino e aunoa ma le faalavelaveina ise iuga e faatulai ese. O loo iai le talitonuga o nisi e ono toe ave e le itu tete’e le faai’uga ua aumai i le faamasinoga maualuga (Supreme Court).