E silia i le to‘a onosefulu tagata palota ua maua i sailiiliga a le ofisa o faigapalota e iai auala taufaasese ma faiga lē amiotonu na mafai ai ona lesitala. Ua aofia ai i lea aofaiga ma ni tagata se toafā ua maua ane foi e tasi le pepafanau na faia uma ai a latou lesitala, ae eseese itumalo ua lesitala ai.
“E sefulu mataupu ua matou tuuina atu i leoleo mo ni suesuega ma faia i ai ni moliaga faasolitulafono,” o le finagalo lea o le sui Komesina o faigapalota le susuga Faimalomatumua Mathew Lemisio, ina ua maua se avanoa e saofafai lelei ai ma le sui Komesina i lona ofisa i Mulinuu ma faamatala mai faaletonu ua maua ia latou galuega o loo lesitala ai tagata mo le palota tele o le tausaga fou.
“O le itu sili ona tāua i le matou galuega ia maua faaletonu nei ona valaau lea i tagata e omai se‘i sailiili pe faapefea ona tupu mai nei faaletonu”. O nisi o mataupu e oo atu ai ni tagata ua valaau i ai le ofisa, o le tete‘i lea ma fesili pe faapefea ona oo atu se tagata ma se pepafanau e fai ai se lesitala ae o latou moni e ana pepafanau.
Na fesiligia le sui Komesina o faigapalota pe faamata e lē o iai nisi faiga faaalatua o faia e sui o komiti a sui tauva ua agai ai i le ofisa o pepafanau ma saili mai ai faamaumauga ona ave lea lesitala ai tagata e lē o latou tonu ia e faasino i ai faamaumauga o tagata fananau.
“E lē o iloa e matou lena tulaga, ae o le vaega tāua lea ua fesoasoani e maua ai faiga faapea ona o lea ua aumai se vaega o faamaumauga o pepafanau matou te iloa tonu ai le tagata o le a lesitala. O le isi itu ua matuā faamamafa lava le manaomia o le pepafanau e avatu ma se ID poo se pepa faamaonia e iai se ata, poo se tusifolau o le tagata o le a lesitala”.
Faaalia e Faimalomatumua o nisi o faaletonu ua maua na mafua mai i lesitala o isi faigapalota ua mavae. “E ui lava o faaletonu mai lena taimi ae a maua lava e le aufaigaluega ma vave ona faia se suesuega ina ia foia ni faaletonu”.
O loo taumafai le sui Komesina o faigapalota ma lona ofisa ina ia faatino ane le palota tele o le tausaga fou, ua mafai ona aveesea uma ni faaletonu o aafia ai lola palota a itumalo taitasi aemaise lava i le sese o tagata o loo lesitala ai, ae tatau ona tuu tonu i le itumalo e agavaa ona palota ai.
O se pulenuu o se tasi o afioaga ua faalua ona maua o alu atu ma faamaumauga lē sa‘o e lesitala ai tagata ma ua tuusa‘o loa i leoleo ona ua lē usitaia le fautuaga na ave muamua i ai. “O loo matou talitonuina le galuega a sui o nuu ma pulenuu ae ona o faaletonu nei ua aliali mai, matou te manaomia ai lava nisi faamaoniga e pei o se tusi mai se faifeau o se nuu e mautinoa ai e moni o lea tagata poo ni tagata e nonofo tonu i se nuu e faasino i ai se itumalo o loo fia lesitala ai”.
O Aperila na ave ai mataupu i leoleo mo suesuega, ae na tatagi le telefoni a le sui Komesina o faigapalota a o faia le talanoaga e mafua ai lenei lipoti. Na tali le telefoni ma iloa ai o le alii leoleo o loo faia suesuega na valaau atu.
Na faalogoina ai ua faapea ane le alii leoleo i le sui Komesina ua tele a latou galuega ona o mataupu mai le ofisa o faigapalota. Na saunoa i ai le sui Komesina ua lagona le vaivai o se lagona pe afai o le tali ane lea a leoleo i mataupu ua ave i ai mo ni suesuega ma faia ni moliaga.
Na saunoa mai Faimalomatumua, e lei oo atu lava se tala mai leoleo poo ua fai ni moliaga o nisi mataupu. “E faanoanoa ai lava pe afai o lea e naunau atu e saili le faimea tonu, ae e lē o ano mai leoleo i le matou galuega e fai faatasi.”
