E ui e faapea sa laumanuia tala ile tapunia ole kamupani tele ole Yasaki i Vaitele ae ole faasilasila ai ele kamupani ole tapunia loa ise taimi ole tausaga fou, ose tala e lei nofo lelei i lagona o tagata faigaluega auā o lea ua moni tala salalau solo.
“Talosia e taunuu folafolaga o faamanuiaga mulimuli ole a matou maua auā ole upu moni ole a motu le pa‘u falaoa pe a lē toe maua se galuega e tausi ai le aiga aemaise o fanau”.
Ole tala lea ase tasi o tina talavou oloo faigaluega nei ile Yasaki ina ua asiasi atu ile kamupani ile tuanai ona faalauiloa le tapunia ole Yasaki Samoa. Ua musu le tina e faailoa lona suafa ona e manumanu i lana galuega i maumau ae o lea ua folafola atu ele pulega faamanuiaga tau tupe e maua pe a oo ina tapuni le kamupani.
“Ole sefulu lenei o tausaga o la‘u tautua ile Yasaki ma e ui lava ina iai faafitauli ole galuega i nisi taimi ae ole seleni lea oloo faalagolago iai lo‘u aiga”. Ua faaalia ele Peresetene ole asosi a tagata faigaluega ole Yasaki Samoa le susuga Uelese Tupuola, e lelei faamanuiaga ua faailoa atu aemaise oi latou ua tele tausaga ole tautua ile kamupani, ole a sili ona mamafa iai faamanuiaga mulimuli ole a latou maua.
“Ole a faia se fono ale matou asosi e faatalatalanoa ai le tulaga lea aemaise ole a avanoa ai foi tagata faigaluega e aumai ni lagona faaalia ma fesili ini vaega e fia silafia atili ile fuafuaga ua faataoto mai ele pulega’.
Ole susuga Uelese ua silia ile lima tausaga o galue ile kamupani ma o lana silasila i faamanuiaga ua faailoa atu e lelei. Na ia faaalia e suamalie ona e pito lelei lava tupe ole a maua ei latou ua tele tausaga ole tautua. Ise feiloaiga male alii pule ole kamupani le afioga Funefeai Oliva Vaai, na ia aumai ai se ata faataitai ole faamanuiaga mulimuli. Na ia faaalia e mo tagata faigaluega e na ole tausaga talu ona galulue e maua lava le latou sefulu ma ona tupu afe tala.
“Ose seleni lelei e maua ai se isi fesoasoani ile tagata faigaluega pe faatau ai se taavale e fesoasoani ile aiga pe fai ai foi se pisinisi laititi e tua iai ile taimi ole a tuua ai le kamupani”.
Ua 25 tausaga talu ona faagaioia i Samoa galuega ole tuufaatasia o uaea o taavale ele Yasaki ma faatu i fafo aemaise lava Ausetalia. Faaalia e le Pelesetene o le kamupani e ui ose faaiuga e lē logo lelei ile toatele o tagata faigaluega ae ua lē mafai ona foia nisi o faaletonu ile faagaioia ole kamupani i Ausetalia lea foi ole a tapunia. Ole tausaga fou e faatino ai le faaiuga lenei peitai e lē o iloa poo le ā le aso male masina. Oloo iai le lagona ole pulega pe atonu lava e mae‘a lelei le tausaga fou 2017 ona faatoa tapunia lea ole Yasaki.
Ole taimi nei e lei faailoaina ele Malo se fuafuaga mo le faaaogāina o fale tetele na fausia e faatino ai galuega ale Yasaki i lona nofoaga autu i Vaitele-tai.
Oloo laumanuia solo lava faamatalaga ma ua laumanuia ai foi ole a vaai se kamupani gaosi seevae ole a faaaogāina le nofoaga.
Peitai sa fesiligia le pulega pe moni ae ole tala mai e lē o mautinoa lea tulaga. Ole kamupani lea sa faalagolago iai le Malo ile siitia ai o tupe e sasaa atu ile tamaoaiga ole atunuu e ala ile faafaigaluegaina o tagata e toatele. E pei ona silafia o tausaga amata ole Yasaki sa maua le lua afe ma sili atu le numera o tagata faigaluega. Ole taimi nei ua na ole 740 le aufaigaluega oloo iai ona ua faaitiitia le numera e mafua ile tuuitiitia o manaoga ole kamupani i Ausetalia oloo faatau iai uaea o taavale mole gaosia o taavale i totonu o lea atunuu.
