O le mae‘a o taaloga a le All Blacks ma le Manu Samoa na vaaia lava le faatutu gata o le toe faaauau ai o galuega i le faaiuga o le vaiaso i Samoa.
E ui i lea, e na o le fanau aoga na taofia a latou aoga i le Aso Faraile ae o le mafuaaga e lē o taaloga.
O le tulai mai pea o vevesi i le va o aoga a le atunuu e mafua mai lava foi o taaloga, na taloina ai e le Matagaluega o Aoga, Taaloga ma Aganuu ni faatasiga ma na faia i itumalo taitasi, e talanoa ai le faafitauli tele lenei.
Faaalia e le afioga Matafeo Falanaipupu Tanielu Aiafi, le Ofisa Sili o le Matagaluega, ua leva ona iai le manaoga ina ia faia nei talanoaga ae ona pau lenei o le taimi ua maua ma na potopoto lava aoga o sone taitasi poo itumalo ma na iai ma sui o le Matagaluega na faasoa atu i nei itumalo eseese o le atunuu auā le faatalanoaina o lenei mataupu.
Faaalia e le Ofisa Sili, o le tele foi o taimi e tulai mai lava vevesi i le va o aoga, e maua mulimuli ane faamatalaga e mafua mai lava ona o faiaoga ma o le mafuaaga lea o le faia o lenei faatasiga ina ia oo atu se upu a le matagaluega i faiaoga o faia nei uiga lē talafeagai.
Ua tele auala ua taumafai ai le matagaluega ina ia taofia le tulai mai o vevesi i le va o tamaiti aoga ae o le tausaga lenei na toe aliae ai foi nei vevesi ae na mafua mai lava i taimi o taaloga. O vevesi mulimuli nei na tulai mai i le taamilosaga lakapi a aoga poo kolisi maualuluga ma e toeititi lava leai se aoga e lei aafia ai i fusuaga i le mae‘a poo le faagasolo ai o aoga.
O le tausaga lenei i le isi taamilosaga faaletausaga e taofi ai le taumafa tapaa (Smoke Free) na suia atoa e le matagaluega ae ua ave ai le taulai i le taalo tausaafia ma le taofi o vevesi i le va o aoga.
O lea foi na fautuaina pe le tuu loa taaloga ma le pisa ae fai mai le tali e faigata tele lea tulaga ona o le aafia ai o le isi vaega tāua lea o le ola aoaoina o fanau a le atunuu ae e toaitiiti lava i latou ua faaleagaina ona o le manao e faatupu vevesi i le va o aoga.
O lea la ua iai le faamoemoe e fai ma fono faiaoga o aoga eseese aemaise ma le matagaluega ma o le faaiuga o le vaiaso na tea nei na amata ai nei mafutaga.
