Ua ta’ape le mafutaga tuufaatasi a tupulaga talavou o le puleaga a le Ekalesia Katoliko i Samoa, Tokelau ma Amerika Samoa sa tumutumu ai le nofoaga o le Tofa Mamao i Leauvaa, faapea isi nofoaga o sauniga tetele a le ekalesia i Samoa, ae o se mafutaga na molimauina na avea ma faatupu lagona i tupulaga talavou ia tutumau i le ola faaleagaga.
O le mafutaga na saunoa ai le afioga i le Palemia susuga Tuilaepa Lupesoliai Sailele Malielegaoi e tatala aloaia ina ua taunuu le solo tele a tupulaga talavou mai Vikaliatu eseese i luma maota o le Malo i le eleele fou. Na faamanatu e Tuilaepa i tupulaga Katoliko le tāua o le ola talitonu ma faatuatua ma tutumau i a’oa’oga faakerisiano.
“O outou o loo faafaileleina ma a’otauina fanau talavou Katoliko i Samoa nei, ina ia saga tapu’e ai lo latou ola faaleagaga, e faapei ona atagia i le tou ta’utinoga ua faaupuina faapenei “O a’u o tupulaga talavou mo Keriso o ia o lo’u ala, o lo’u moni ma lo’u ola”.
Na saunoa foi le Palemia ma ia faailoa o se tiute tāua tele mo taitai o ekalesia le unai pea o mafutaga tuufaatasi e faaolaola ai pea i loto o tupulaga le tāua o le tautatā i le moa o le ala i le ola faakerisiano, ona o le saoasaoa o suiga fou o le olaga ua lofia ai tupulaga o nei aso. “I le falute mai o le mau suiga ogaoga o loo luitauina ai tupulaga o Samoa, ma ua taaina gofie foi i ai ma loto ma agaga o le toatele o fanau talavou i nei ona po.
E matua tatau ai ma onomea ona sagai ane ai o le tai o Taitai o le Ekalesia e unai ma unai pea polokalame faifaipea e mauaa ai le soifua faaleagaga o tupulaga talavou i a’oa’oga ma talitonuga faaletapuaiga faale-Katoliko, ae faatumau atili ai foi ma le savavali o fanau i le moa o le ala”.
“Afai e mauaa pea ia ituaiga feiloaiga faapenei, o ina foi e maua ai le tulaga lelei ma le filemu i le tatou Malo ina ia agai tonu ana tonu fai i le atinae o le atunuu e le tau soona faaalu ai le taimi aluvale le tau tomanatunatu i auala e faatoa filemu ai se atunuu ona o vevesiga e tulai mai e afua i tupulaga ua le amio pulea”.
“O le mafuaaga lena e tāua ai tele i le tatou Malo le faalogologo pea faalogologo pea o fai mafutaga faapenei a ekalesia uma i Samoa. I le tausaga e 1982 o taimi pito vevesi ia e faafa ona fesuiai ai le tatou Malo ona o le tele o le vevesi leai ma se galuega aoga na faia i fesuiaiga o na faigamalo e fa na tulai mai i le 1982 na fevesiai i le taumafai poo ai o le a tulai mai e pule.
Na’o le pule a na faatāua ae ua lē o toe faatāua le auauna o i latou na tofia e tautuaina le atunuu.”
“O le tulaga lena ou te faalupe ai pea mafutaga faapenei o se tala leomalie i taitai o le tatou Malo aua o le a agai tasi ai taumafaiga a le tatou Malo i le atinae o le atunuu ia ma lagolago atu foi i atinae a le Ekalesia”. O le faafa lenei o taimi o usuia i Samoa mafutaga tuufaatasi a le Ekalesia Katoliko i Samoa.
