Ole mae‘a ole fonotaga amata ale Palemene o lenei tausaga ia Ianuari na faaleo ai se finagalo popole ole Minisita Lagolago o Fesootaiga le tofa Lealailepule Rimoni Aiafi, ile tele o pisinisi a Saina ua vaaia i soo se vaega ole taulaga aemaise ua faapea foi ile agai i nuu ma afioaga ole atunuu i Upolu ma Savaii.
O atugaluga ole minisita lagolago ua ia fautuaina ai le Malo e silasila ane i lea tulaga ona ua leai se avanoa mo tagata lava o Samoa mo ni pisinisi aemaise o manumanuga i aafiaga o pisinisi a tagata Samoa.
Ole vaiaso ua mavae na faailoa ai se finagalo ole Pulenuu o Salelologa i Savaii ma ia faamaonia e moni ua iai le tapu ale nuu ua faia ua faasā ai eleele faaleaganuu o Salelologa ona faia ai se pisinisi ase Saina, ae o lea tapu e lē aofia ai eleele ole Malo i totonu ole taulaga o Salelologa.
Faaalia ele Pulenuu ise talanoaga ma le nusipepa ole Samoa Observer, ole autu ole tapu ole fia tuu avanoa lea i tagata ole nuu e atinae ai a latou lava pisinisi. Ole fono ale asosi ole aufaipisinisi i Savaii na ta‘ua ese molimau faatuatuaina na laga ai manatu o nisi o sui ile tulaga ua molimauina ile faaopoopo atu pea o pisinisi a tagata Saina i Salafai aemaise lava ile taulaga i Salelologa.
O atugaluga ma popolega nei ua faaleo foi e matai ole afioaga. O atugaluga ole Minisita lagolago le tofa Lealailepule Rimoni na ia ta‘ua ai le faigata ona tauva o pisinisi a tagata Samoa ma tagata Saina.
O faleoloa tetele e pei o supamaketi ma oloa siiatoa sa umia ma faagaioi e tagata Samoa. Ole taimi nei ua uu uma e Saina ia pisinisi. O faleoloa i nuu i tua ua toatele Saina ua latou lisi ma faagaioi ai pisinisi.
Peitai na faaalia ele minisita lagolago ile masina ua mavae atu nei, e lelei tele le faatauva o pisinisi auā e pa‘ū ai le tau o oloa manaomia i aso uma ma e fetaui ma o tatou tagata e maualalo le tamaoaiga ma utiuti le faasoa tau tupe, peitai e ao ile Malo ona toe asiasi iai ile mataupu lenei e pei ona faaalia e Lealailepule.
Ole lelei o oloa e pei o oloa i totonu o fale e aofia ai ipu ma ulo fai meaai faapea meaafale, ua finauina e nisi ole au faatau le tatau ona silasila iai le Malo ona o nisi o ia oloa na latou faatau mai i pisinisi a Saina e lē umi ona faaaogā ae faaletonu.
O oloa tau taumafa tasi lea atugaluga ole ‘au faatau ona ole tele o nisi o oloa mai Saina ma isi atunuu Asia e leai se gagana faaperetania e faamatala mai ai poo ā ia oloa ma mea o gaosia ai, ae na‘o le gagana Asia e lē malamalama ai tagata faatau.
Ua faaalia ese ofisa sinia ole vaega ole soifua maloloina lautele poo le Public Health oloo vaaia le tulaga saogalemu o oloa tau taumafa, e lē o faatagaina ni oloa e leai se faamatalaga faaperetania.
“Ole isi lea o a matou galuega ole siaki o oloa ae afai o iai ni oloa faapea e mafai ona matou aveesea”.
