Tapole foliga fafao i le taga ae sasa i le mautofu

Ua latalata mai le Aso Sa o le fanau le Lotu a Tamaiti i Samoa. O se aso e faatāua ai fanau e pei ona silafia e le atunuu faitau nusipepa. O fanau foi o le meaalofa a le Atua poo le oloa tāua, ae ua lē muta pea mataupu e oo i le faamasinoga e molia ai nisi ona o le sauaina o fanauiti.

E faapena se mataupu ua faia i ai se faaiuga a le faamasinoga maualuga ua nofosala ai i le falepuipui se tina 33 tausaga o lona soifua. O le tina o Punipuao Kopa na faamaonia i se suesuega a le faamasinoga ona moliaga o le tuulafoai o le oloa tāua, ma le moliaga o le faia o se faaoolima faamanu‘alia ai le tino o lana tama teine 5 tausaga le matua.

O le aso 7 o Fepuari o le tausaga e 2014 na tulai mai ai lenei solitulafono i le pitonuu o Vaiafai i Iva i Savaii. O Punipuao sa malaga ma lana tama teine e asiasi i ona mātua, e faapea o lona tamā moni ua toe nonofo ma se isi tina poo lona stepmother.

O le aoauli o le aso fitu lea o Fepuari o le tausaga ua mavae sa alu ai le faiva o mātua o le tina, ae nonofo na o Punipuao ma lana tama teine i le fale. O le molimau a leoleo o Salasalamaua Ape sa lalaga lona fala. E lē mamao lona fale ma le fale o lē ua molia.

O lana molimau na ia faamatala ai e faapea a o lalaga lona fala sa ia faalogoina le tagi leotele ane o le teineitiiti na aafia. Sa ia alu ese ma le fale ma savali atu agai i se vaega i autafa o lo latou fale ma autilo poo fea e sau ai le tagi.

Sa ia vaaia ai lē ua molia o loo ia pole mai foliga o le teineitiiti i ona lima. O lana vaai e faatolu pe sili atu foi ona faia lea gaioiga. Na faamatala foi le molimau na ia vaaia foi ua uma lea gaioiga ona o ane lea o lē ua molia ma lona afafine ua saofafai i fafo o lo latou fale.

Fai mai sa faaauau ai foi ona fepo e lē ua molia le teineitiiti. Sa faaaogā foi se seevae e sasa ai le tino o le teineitiiti. Na ia faalogo atu foi o fai le ote a lē ua molia i lana tama teine ma fai i ai i le leaga ma le faainaelo i lo latou fale.

Ina ua uma le gaioiga o le fasiga o le teineitiiti na toe agai le molimau i lona fale ma faaauau le lalagaina o lona fala. Peitai e lei leva ae ia toe faalogo foi i le tagi a le teineitiiti. Na ia vaaia ai se isi gaioiga o se lala mautofu o loo uu i le lima o Punipuao o loo sasa ai se atigi taga o loo nonoa le gutu i se fasi uaea ma tautau i luga o se lala o se ‘ulu i tafatafa o le fale.

O le gaioiga lea o loo faia ae o loo faataitaio mai le teineitiiti i totonu o le atigi taga. Fai mai le molimau pe faatolu poo le sili atu foi ona faia lea gaioiga. Na mae‘a lea gaioiga ona foi lea o lē ua molia i totonu o le fale ae tautau ai lava le atigi taga i luga o le ‘ulu ma le teineitiiti o loo i totonu.

E lei leva poo le ‘afa itula talu ona mae‘a lea gaioiga ae vaaia loa le taunuu atu o le faiva o mātua o lē ua molia. O le molimau a le tina (stepmother) o lē ua molia, na ia ta‘ua ai foi le vaaiga i le atigitaga ina ua a‘e lo la faiva. Na savali atu i ai ma pōpō le atigi taga ae faateia i le faalogoina o le leo o le teineitiiti mai totonu o le atigitaga. Na ia tatala ma aumai i fafo le teineitiiti lea na fai ane o ia ua fia maua se meaai.

E aliali mai i faamaumauga a le faamasinoga na fai si umi talu ona tupu le solitulafono ae faatoa fesiligia ma faatalanoa e leoleo le tina o le teineitiiti. O Iulai o le tausaga lava ua mavae na faatoa faia ai lea faatalanoaga lea e faapea na ioe ai lē ua molia i lana gaioiga na fai, peitai sa ia toe teena moliaga a leoleo.

O le faaoolima na faia e pei ona faaalia i le faaiuga tusitusia a le faamasinoga, na iloa i sailiiliga faafomai i manu‘a na aafia ai le teineitiiti ma le uno‘oa o se vaega o lona tino. Na teena e le faamasinoga se faamatalaga a lē ua molia i le ofisa faanofo vaavaaia e faapea o lona tamā ua maliu ma ua ioe i leoleo i le gaioiga na ia faia.

Na teena foi e le faamasinoga le molimau a le tina o Punipuao na ia ta‘ua ai sa ia sasaina lana tama i se salulima ae lē o ona lima ma se seevae. Sa teena foi lana molimau na ia faailoa ai o le atigitaga na fafao ai lona alo o se taupega, ma e masani ona taupe ai ae o ia lava sa latalata i ai ona e lilia le teineitiiti i le taupega e maualuga.

O le faatoa molia lea o Punipuao i se solitulafono, ma ose itu lelei mo ia. Peitai na faaalia i le faaiuga o le faatuatuaga o fanauiti o o latou mātua aemaise le tina i lo latou ola lelei ae e lē o le tulaga lea na iai.

O lē ua molia ma lona toalua e leai se la fanau moni, ae o le teineitiiti na aafia ma se tamaitiiti o le la fanau tausi poo se vaetama. E 3 tausaga ma le 3 masina ua falepuipui ai lē ua molia.