Tapenaga mo se manuia o Tupulaga o a Taeao

Faaevagelia a le Vaega a Faaaliga
Faaevagelia a le Vaega a Faaaliga

Lea ua savalia nei ile lima tausaga talu ona faatino polokalame faaleaganuu i totonu o le autalavou Metotisi i Manukau auā le nofo malamalama ma le iloa o fanau talavou ile olaga o le tama ma le teine tautua.

O se tofa na a‘e ile afioga ile Sea o le faasinoti i Aukilani i Saute, le susuga ia  Masunu Utumapu ma lona faletua ia Senerita Utumapu, faatasi ai ma le Ekalesia i Manukau ua tatau ona faatino se polokalame o le aganuu e tapue ma faataleleiina ai olaga o fanau auā lo latou lumanai manuia ma ia faatāua i o latou olaga le aganuu a Samoa.

E fesuisuiai autu i tausaga taitasi ae auga lava i le olaga o le tama ma le teine Samoa. O le autu sa tatai i ai lagona o vaega e lua sa vaevaeina i ai le autalavou i lenei tausaga, “E Faagaganaina Oe i lau Tautua.”

O se ulutala o loo faamatala mai ai le uiga moni o le polokalame e pei ona faatinoina i tausaga taitasi; (1) saili le tausala o le tausaga, o ia lena na te tauaveina ona tiute i totonu o le matagaluega, malo, felaugaina, ae vaavaalua ma lona soa poo le tamaitai e tulaga lua i le tausaga atoa.

O le tumutumuga ma le aotelega o le polokalame, ia iloa e tamaiti le ituaiga tautua, ma ia iloa fai le auaunaga i totonu o aiga ma le Ekalesia. Auā a lē faia le tiute e lē iloa e le tamaitiiti upu e tautala ai e pei o le folafolaina o le sua, taumafataga, ma le tele o mea e ao ona iloa e le tautua ona faatino.

Faaevagelia a le Vaega a Faaaliga
Faaevagelia a le Vaega a Faaaliga

O le Aso Toonai ua mavae, 11 o Iuni na toe felanulanuai ai togiga a vaega e lua, a Kenese ma Faaaliga, i le hall a le Ekalesia Metotisi i Manukau e toe saili ai se tausala na te tauaveina tiute a le matagaluega i lenei tausaga seia oo ile tausaga fou 2017, faatasi ai ma le fatinoina o tiute ma galuega a le tautua.

O le afioga ile Sea ia Masunu Utumapu na ia tatalaina le polokalame ile tatalo, ona saunoa lea o le fofoga o le Aso, o le taitai foi o autalavou, ia Rev Laupepa Fili e faafeiloai i faamasino na filifilia, le tofa ia Fata Ueligitone Malifa ae faapea foi ile faletua ia Toesulu Brown, faapea le auvalaaulia sa molimauina lenei faamoemoe.

E eseese vaega sa agai i ai le faatinoina o le polokalame o le aso.

(1) Tausala

I le paluina o le ‘ava, fesili ma tali, puletasi, taleni tausala, ma le taualuga lea na sola ai ma le ‘au a Faaaliga le Manumalo, le tamaitai 18 tausaga ia Legatasia Tiumalu Fuifui mai le afioaga o Saleaumua, Faleasiu, Falelatai ma Saleapaga, o le alo o Ropati ma Ailini Fuifui, ae o loo aoga i le Iunivesete a Aukilani, ae Tulaga lua le tausala a Kenese le tamaitai 16 tausaga ia Valdina Fetuao Fonoti mai le afioaga o Fogasavaii, Vaipua, Satupaitea, Lepea, Samata i Tai, o le alo o Fonoti Alofasaupo Fealoai ma Fetu Faleafaga Alofasaupo Fealoai, ma o loo aoga i le Kolisi o Tagaloa.

(2) Tāfau, Sui ‘Ava, Agai ‘Ava – Manumalo Faaaliga, Tulaga lua Kenese.

(3) Folafolaina o Toonai: Toonai saunia lelei, faalupega o toonai a matagaluega, igoa o taumafa poo i‘i o toonai Gagana Faaaloalo – Manumalo Faaaliga, Tulaga lua Kenese.

(4) Faamatalaina o le ata tusi e fua i le autu 12 – 18 tausaga – Manumalo Kenese, Tulaga lua Faaaliga.

(5) Faaevagelia: E faaautu ile ulutala filfilia o le aso. Manumalo Faaaliga, Tulaga lua Kenese.

(6) Solo – Manumalo Faaaliga, Tulaga lua Kenese.

(7) Siva Mauluulu Pese fatu: le gaseseina o se taumafa Samoa – Manumalo Faaaliga, Tulaga lua Kenese.

(8) Lauga i le Ulutala 15 – 25 tausaga – Manumalo Faaaliga, Tulaga lua Kenese.

(9) Tala Faasamoa – Manumalo Faaaliga, Tulaga lua Kenese.

(10) Folafolaina o Faaaloaloga Sua – Manumalo Faaaliga, Tulaga lua Kenese.

(11) Togiga – Tutusa ai ‘au e lua.

Vaega a Faaaliga i le Paluina o le ‘Ava
Vaega a Faaaliga i le Paluina o le ‘Ava
Faamasino filifilia o Fata Ueligitone Malifa ma Toesulu Brown
Faamasino filifilia o Fata Ueligitone Malifa ma Toesulu Brown

O le aotelega ma le tuufaatasiga o le faamoemoe o le autalavou sa iai ile polokalame ile Aso Toonai ua pepese fiafia ai le ‘au a Faaaliga ile manumalo poo le tulaga muamua o lenei tausaga, ae aiaiuli mai ai le vaega a Kenese ile tulaga lua.

E ui i le eseese o vaega na totofi i ai le autalavou ae sa maitauina le mataalia ma foliga fiafia o mātua faapea le susuga ile Sea ia Masunu Utumapu ma lona faletua ia Senerita ile lagolago malosi ma opogi le faamomoe a fanau talavou mo so latou lumanai manuia mo a taeao. Aemaise ai le telē o le suiga ma le iloa ua oo i ai fanau ile faatinoina o le aganuu Samoa faapea le olaga tautua, auā o le ala ile pule o le tautua.

Ua iai le faamoemoe o le autalavou e tapena se isi polokalame e sili atu ile tausaga fou ile alofa o le Atua.