E lei toe faatafa le ausoka a tamaitai Samoa i le faatinoga o le taaloga i le la taaloga ma le Au a tamaitai a Papakura City Football Club i le taaloga lava lenei o le soka. O taaloga nei o loo tapenapena ai le Au masii a Samoa i Taaloga a le Pasefika i Saute (South Pacific Games) i Papua i le masina fou o Iulai.
Na vaaia le faafiafiaina o le alii faiaoga ia Papalii Tala Savaiinaea Salamasina i le tulaga na ausia i lea taaloga, aemaise ai le femalamalamaai o tamaitai i le faasoasoaina o le polo i lea taaloga.
E fai o le vevela o le malulu i lea afiafi ae na molimauina pea le atoatoa o le tali mai o le Au i lea taaloga. O loo galulue pea le faiaoga ma le pulega ina ia faaleleia atili pea isi vaega o loo fia faaleleia o le taaloga.
Ina ua mae‘a le taaloga i le afiafi o le Aso Tofi ona sosoo ai loa lea ma le latou sailiga seleni o le tausala i le afiafi o le Aso Faraile. Matagofie lea afiafi i le taupati mai o tauaiga e lē gata i aiga o tamaitai taaalo ae faapea foi le pulega o le tatou Au ma le lagolago fesoasoani a aiga, uo ma ē masani, faatasi ai ma le agalelei o le Ekalesia PIC Papatoetoe i Wyllie Road i le faaavanoaina o le nofoaga e faamautu i ai le Au mo sina taimi a o lei toe foi atu i le nofoaga autu i Mt Smart Stadium Oceania Football Federation.
I le faataunuuina la o le “tausala” na saili seleni ai le Au a tamaitai i lea afiafi o le Aso Faraile na maua ai se vaega seleni silia ma le $4,000 NZ e fesoasoani ai i tapenaga mo le faamoemoe i Papua i taaloga o le South Pacific Games 2015.
I le taimi nei o lea ua toe see atu nei le Au a tamaitai i le nofoaga autu o le soka i le pulega Oceania Football Federation Mt Smart e faaauau ai tapenapena auā lava le fia auai ai i taaloga South Pacific Games i Papua, atoa ai ma nisi o taaloga o loo totoe.
