Afioga i le Loia Sili, Lemalu Herman Retzlaff, i le tatalaina o le faatasiga e talanoa ai solitulafono o fesootaiga televavave faaonapo nei

Afioga i le Loia Sili, Lemalu Herman Retzlaff, i le tatalaina o le faatasiga e talanoa ai solitulafono o fesootaiga televavave faaonapo nei

E fiu lava le tagata amio leaga e sola e tulituliloa pea e tulafono aemaise lava tagata e eleelea ma palapala loto. O se finagalo lea o le saunoaga autu a le Palemia susuga Tuilaepa L Sailele Malielegaoi na ia tatalaina le mafutaga o se aoaoga e faatatau i faiga solitulafono a nisi o tagata ua faaaoga ai fesootaiga televavave poo le social media.

O sui mai matagaluega a le Malo ma auaunaga tau initaneti ma isi fesootaiga televavave faaonapo nei i Samoa o loo auai i le aoaoga na tatala i le aso ananafi Aso Gafua 2 Iulai 2018 i le faletalimalo o le Taumeasina Island Resort. O sui mai Malo o le Iuni a Europa e galulue i tulafono faavaomalo mo le puipuia o tagata mai solitulafono o fesootaiga televavave o loo faatautaia le aoaoga ma le faamoemoe autu o le a maua ai se silafia o auaunaga eseese tau fesootaiga a le Malo ma pisinisi tuma’oti i ia ituaiga o soligatulafono.

Ua faailoa e le Palemia le toatele o tagata o isi atunuu e aofia ai foi ma Samoa ua molia i luma o le faamasinoga ona o le feaveai lea o ata matagā i luga o ia fesootaiga, aemaise o gaioiga e gaoi ai tupe a isi tagata ae faaaoga ni faiga eleelea ma le palapala. 

O le feagaiga ua ta’ua o le Bnagladesh Convention o loo talanoaina ma faamalamalama e le savali o sui a le Iuni o Malo Europa le EU i le faatasiga.

O se feagaiga e faasino tonu i faiga solitulafono e faaaoga ai fesootaiga televavave ma o le taua o le feagaiga e pei ona faaalia e le Loia sili le afioga Lemalu Herman Retzlaff o le maua ai o le malamalama o leoleo ma loia i faiga ma auala eseese o loo faagaioia ai ia soligatulafono.

Mo Samoa lava ia o fesootaiga televavave o loo maua ai fesootaiga mo togafitiga o gasegase faapea le itu i aoaoga, peitai na saunoa le Palemia o le fono a Malo o le Taupulega sa auai na afea ai foi le mataupu lava lenei e tasi.

O atunuu laiti e pei o Samoa e sili ona ogaoga ona aafiaga i ia solitulafono ona e laititi ma toaitiiti lona faitau aofai e fua lea i atunuu tetele e faitau miliona tagata o loo nonofo ai.

E le toe tau faailoa suesuega o feagai nei ma leoleo i le sailia o se tagata poo ni tagata o loo latou faasalalau ni tuuaiga malolosi faasaga i le Palemia ma le Malo ma oni faasalalauga o loo tetee iai le taitai o le Malo ona e le sa’o. O aafiaga o aiga ma fanau ma tagata o aiga i ia faasalalauga na faaalia e Tuilaepa e ogaoga ma e oo lava se tagata o aafia i le tuugamau e le toe aveesea le matuitui tiga o ia tuuaiga le moni.