O le Team Samoa Netball Qld na faatuina ia Iulai 2014 ona o se faamoemoe ia faia se taamilosaga netipolo a tamaitai o le Pasifika i Kuinisilani nei i le aso 1 e oo atu i le aso 8 o Novema o le tausaga nei, e faia lea i le McGregor Netball Courts, McGregor.
O le vaega na talimalo (host nation) o le Enuamanu-Atiu Niu Maruarua, o latou foi lea na amataina lea faamoemo. O le manaoga lava ia iai se faagatama auā tamaitai o le Pasifika ona o le taimi nei e lē o iai se faagatama mo tamaitai lava latou.
O le taimi muamua lea ua faia ai se taamilosaga netipolo a le Pasifika i Kuinisilani nei, ma o se taimi muamua foi lea ua iai se Komiti Netipolo a Samoa i Ausetalia nei. O le taimi nei e 15 ‘au a Samoa o loo faaulu i lea faagatama, e 150 tamaitai ma tina Samoa o le a taaalo ai i ia aso.
O le autu ma le auga o lenei taamilosaga, ina ia omai faatasi le atu Pasifika e faifai mea faatasi ma faatāua pe fefaasoaai a tatou aganuu ma tomai tau taaloga (Enhancing Multiculturalism through Sports and Culture).
O le komiti o loo nafa ma lea matafaioi, o loo iai le Afioga Faasuamale‘aui Siaosi Tupuola, Virginia Lagā, Ranandy Stanley, Sam Futi, Su‘a Uelese Akeripa, Muliagatele Kelly Chong-Nee, Subrina Crawley faapea le tamaitai ia Soti Letoa.
O loo faia faasavali a latou sailiga seleni e fesoasoani ai i tapenaga e pei ona iai le latou posiva i le Aso Toonai ua mavae atu. Sa lagolagoina e le mamalu o le atunuu aemaise o aiga, uo ma ē masani.
O lenei taamilosaga o loo faamoemoe e faia i tausaga uma, o loo iai foi se naunautaiga o le Komiti ia faaauau pea galuega faanetipolo pe a mae‘a lea taamilosaga auā tausaga o i luma.
O loo iai foi le faamoemoe o le a iai se isi motu o le Pasifika o le a tulai mai latou te faatautaia le taamilosaga o le tausaga fou.
