Tapena se kamupani Saina ise fale tuuapa i‘a

 Faaalia ele Minisita o Faatoaga ma Faigafaiva susuga Laauli Leuatea Polataivao Schmidt, ose kamupani ole a mafai ona tuuapa ai i‘a e pei o apa eleni
Faaalia ele Minisita o Faatoaga ma Faigafaiva susuga Laauli Leuatea Polataivao Schmidt, ose kamupani ole a mafai ona tuuapa ai i‘a e pei o apa eleni

Ole kamupani ole Huanan i Saina e fai ana pisinisi tau faigafaiva lea oloo faagaioia se isi ona lala ile Atu Kuki.

Ole kamupani lea ua faailoa mai ele Minisita o Faatoaga ma Faigafaiva le susuga Laauli Polataivao Leuatea Schmidt, ua iai sona naunau mai e faatu sana taumafaiga i Samoa.

Ina ua fesootai sa‘o ile alii Minisita o Faatoaga ma Faigafaiva mose faamatalaga e tusa o lenei fuafuaga sa ia saunoa mai, elē mafai ona aloaia sona finagalo ile taimi nei, ae e sa‘o ua iai le fuafuaga faapea a le Malo.

Sa ia faaalia foi ua iai se faaiuga ale Kapeneta ua ioe ai ile talosaga mai ale kamupani ae oloo faia feutanaiga ina ia malupuipuia vaega uma elē gata ole siosiomaga ae ole itu tau faamanuiaga e maua ele malo ma tagata ole atunuu ole a galulue mole kamupani.

Ole uafu i Satitoa ua fuafua e faaaogā e vaafagota ole kamupani ma ole a faamautu ai foi. Ole autu ole fuafuaga lenei ole fausia lea ose fale tuuapa i‘a poo se cannery e tuuapa ai i‘a. Saunoa mai le minisita ose fuafuaga e ono mafai ai loa ona tuuapa male i‘a poo apa eleni oloo alumia tele i Samoa elē gata ole fofoga taumafa ae mo faalavelave fai ole atunuu.

Ole faaaogāina la ole uafu i Satitoa ose isi itu lelei auā oloo tutu le uafu ua lē toe faaaogāina seia vagana le vaega toso vaa oloo agai iai vaa laiti e toso ai e aofia ai foi ma vaa toso vaa poo tug boats.

Afai ole a taunuu lenei faamoemoe ole itu mautinoa ole a maua ai galuega ale atunuu o nonofo i lea vaega o Upolu, elē gata o galuega ile fale tuuapa i‘a ae ole la‘ueseina o i‘a mai vaafagota.

Ua faailoa ele Minisita o Faatoaga ma Faigafaiva le fale tuuapa i‘a ole a ono faatu ele kamupani mai Saina ma toe manatua ai taumafaiga ale Malo e faatosina mai le kamupani tuuapa i‘a mai Amerika ole Bumble Bee lea sa faapea latou te faaaogā fale tuai teu oloa oloo i luga ole uafu i Matautu i Apia e amata ai.

Peitai e oo mai ile taimi nei e leai lava ni ata vaaia ole taunuu o lea fuafuaga ma tuugatala sa faia male Bumble Bee.

Ole vaiaso ua mavae atu nei sa faia ai ni feutanaiga ile va o sui ole Malo ma sui ole kamupani mai Saina i vaega e tatau ona tapena iai a‘o lei faatinoina lea atina‘e tau faigafaiva.