O le Aso Sa, aso 27 o le masina nei o Setema 2015 ua sauni atu ai le Fono Aoao a Tagata Samoa i Sini e faatautaia ai lana faigapalota mo tofiga fou o le isi tolu tausaga o lumanai. O le susuga i le loia Samoa i Sini nei Isaako Jr. Iose o le a nafa ma le faagasologa o le palota (chief returning officer) i tulaga ua toe teuteuina ia sologa lelei ma faigofie. O tofiga masani e pei o le Peresetene sa umia e Teleiai Sonny Wilson ae peitai na faamavae ma tauave ai e Taloto Vailolo Leilua Siutu lea o le a toe palotaina. E lē gata i lea o le failautusi foi ua faamavae ia Feagai Kirisome ma tauave mai e Vui Masinamua le tofiga, o nisi nei o tulaga o le a palotaina e aofia ai ma le Teutupe, Public officer faapea le Faufautua ia Rev Iakopo Leleimalefaga.
O i latou o le a tulai mai o le a tauaveina tofi fou seia oo atu i le 2018 lea e fuafua e talimalo ai Ausetalia i taaloga a Malo o Taupulega ma auai mai ai le autaalo a Samoa. O le 2014 na talimalo ai le Fono i se feiloaiga puupuu ma se toonai ma le Toa Samoa i Kiama. E lē gata i lea sa faapea foi ona masii mai le Afioga a le Alii Palemia o Samoa ma le vaega faaupufai a le HRPP ma faamanatu i Sini lona 33 tausaga talu ona faavae. Sa tatalaina ai foi ma le ofisa o le Konesula i Liverpool ma amata galue mai ai le Tofa Manogiamanu Fonoti Etuale Ioane.
O le masina foi o Fepuari 2016 e talimalo ai Sini i le tauvaga lakapi taitoafitu lea e malaga mai ai ma le Manu Samoa e tapena ai mo le Olimipeka pe a maua so latou avanoa.
E pei ona vaaia i faamanatuina o Tutoatasi i Sini nei ua fiafia foi tama Samoa o loo taaalo i le liki, volipolo, iuni ma isi taaloga e lagolago ma faasoa o latou tomai ma faamalosiau i tupulaga o loo soifua i Sini i aso faapitoa faapenei.
I polokalame fuafua mamao a le Fono o loo lagolagoina nei le atinae o le gagana e ala atu i le Samoan Language school, aemaise le luitauina o fanau ia faatupulaia le sailiili i aoga maualuluga ma iunivesite.
E momoli atu nei faamalosi i luga o leitio faapei o le FM89 ma nusipepa Samoa aemaise i Ekalesia. O loo fesootai pea sui o le Fono ma leoleo i le gagauina o solitulafono a talavou aemaise nisi sui o le Fono o loo leoleoina aai ma fale faatau i le po, ina ia tineia solitulafono aemaise i pitonuu o Mt Druitt ma St Mary’s.
