Tapena ni moliaga faasaga ile Komesina

 Le Komesina o leoleo afioga Fuiavailili Egon Keil ile savali faaaloalo a leoleo ile Sisigafu‘a ole tausaga nei 2016
Le Komesina o leoleo afioga Fuiavailili Egon Keil ile savali faaaloalo a leoleo ile Sisigafu‘a ole tausaga nei 2016

Oloo tapena e leoleo ni moliaga e faia faasaga ile Komesina o Leoleo oloo faamalolo lē tumau le afioga Fuiavailili Egon Keil. “E lē o toe mamao ae mae‘a tapenaga masani ole faia oni moliaga faasolitulafono ona faapena lea ona faatino tiute ole tulafono”.

Ole finagalo lea ose leoleo sinia (taofia le suafa) ina ua fesiligia e tusa ai oni molimau ua ta‘ua ai o laau malosi e tapu ona umia ese tasi i Samoa sa umia ele Komesina. Faaalia ele leoleo sinia o laau malosi e lua e aofia ai se fana ole ituaiga o le AK-47 sa tatau ona faaleagaina ile polokalame o laau malosi sa faamagalo ai tagata e tuuina atu aupega e lē faatagaina i Samoa ma aupega e mafai ona aumai ile atunuu ae e lei lesitalaina.

Ole sainigalima ua sainia ile tusa ma le fasefulu leoleo sinia oloo umia tulaga ofisa poo commissioned officers, oloo faailoa ai tuua‘iga i laau malosi e lua sa umia ele Komesina o leoleo. Ise vaega ole tusi ma le sainigalima oloo faaalia ai ni faataitaiga o faatonuga e lē tusa ai ma le tulafono sa faia ele Komesina e pei o lona umia ose laau malosi e faapea ose fana taavili laititi machine gun i taimi e alu ai osofaiga poo raid a leoleo.

E faapea foi i lona faaaogāina o aupega e lē faatagaina i taimi o tiute faapitoa a leoleo. Ole tasi itu oloo ta‘ua ole faaaogāina ele Komesina o laau malosi i galuega a leoleo e lē tatau ona faaaogāina ai ni aupega.

Peitai ole lesitalaina ele Komesina oni laau malosi e lē faatagaina e aunoa ma se ioega ale Minisita o leoleo e pei ona manaomia ile tulafono o aupega malolosi ose tasi lea o tuua‘iga oloo sili ona ilitata iai le pulega ole matagaluega o leoleo.

Ole Aso Faraile ole vaiaso nei 11 o Novema 2016 ole a valaau ai le talosaga ale Komesina o leoleo e finauina ai le mau a lana loia e soloia ma faalēaogā ona moliaga e fā e mafua ile osofaiga na tauaveina ai e ni leoleo ni laau malosi, lea na pueina sese ai le susuga Suitupe Misa e fai lana poloka ma lona toalua ile maketi i Fugalei.

Ose vaega o tuua‘iga ua folasia nei i luma ole Palemia ma le Kapeneta oloo aofia ai ma le mataupu lenei i laau malosi e pei ona sauni leoleo e faia ai moliaga ole faauluuluga ole matagaluega.