Tapena Marist Samoa i le Sevens i Samoa 2015

Ua agai atu foi sauniuniga masani a le Marist Samoa i le taamilosaga faalevaomalo i lenei tausaga i le Taitoafitu. I se feiloaiga ma le Fetalaiga Semanu Douglas Ngau Chun i le taeao ananafi, sa fesiligia ai i le tulaga o loo tapena nei i ai mo le Sevens a Malisi i le tausaga nei, ma na ia faamautu mai ai o loo faia pea sauniuniga i le taimi nei auā lea faamoemoe, ma o loo gasolo lelei lava tapenaga uma mo le taamilosaga tele i le faaiuga o le masina fou.

Peitai o loo iai nai suia laiti i le tulaga i le malae faaaogāina i le tausaga nei, ua toe foi mai i le nofoaga a le Malisi i Lotopa ona o loo faalelei le malae i le Apia Park i le taimi nei auā taaloga faitaulia ma le All Blacks ia Iulai tausaga nei lava, ma o loo faasolo galuega toe faalelei o le malae a le Malisi mo le Sevens i le tausaga nei.

Na saunoa foi Seumanu Douglas Ngau Chun e silia ma le 32 ‘au o loo faamoemoe e auai atu i lea taamilosaga a le Malisi i Samoa, ae i le taimi nei o loo iai pea le avanoa mo nisi ‘au e lima e toe faaulu atu mo lea taamilosaga i Samoa a le Malisi.
Sa ia ta‘ua foi o tuutuuga e $800 tala Samoa e faaulu ai le ‘au, ma o loo faaaogāina tulafono a le Iuni faatamā o le Lalolagi i lenei taamilosaga i le aofai o alii taaalo e 12 ma le pulega e toatolu.

E talitonu tasi lea vaitaimi tumutumu ai foi Samoa i malaga a ‘au e malaga atu e fia auai i lea faamoemoe a le Malisi, e lē gata i Niu Sila ae faapea foi Fiti ma Ausetalia ma isi vaega o le Lalolagi.
O loo tapena foi Malisi i Niu Sila e tauva ai i lenei taamilosaga, ae mo nisi o loo fia faaulu ni ‘au mo lea faamoemoe a Malisi i Samoa e faafesootai le telefoni 764 0311 i Samoa ma talanoa sa‘o lava ia Douglas Ngau Chun.Le ‘au a le Marist Samoa i Niu Sila