Ua toe nei o le vaiaso ma nai aso ona amataina foi lea o le taamilosaga masani o loo faatautaia e le Iuni Lakapi Aukilani Samoa. O lea faatoa mae‘a ona faamanatuina le atoaga o le 20 tausaga talu ona faavaeina ma o loo molimauina pea le agaigai pea i luma o lenei taumafaiga mo le manuia aemaise ai lava le tau atinaeina pea o lenei taaloga mo alo ma fanau a Samoa i lenei taaloga.
O se faalapotopotoga ua amanaiaina e le Iuni Faatamā i Samoa ana taaloga ma taamilosaga, ma o loo tele foi ina faamautu mai i ai le tele malaga masii mai i Niu Sila nei, ma ua faafaigofieina ai foi isi fuafuaga a le Iuni Faatamā i Samoa, a o tapena ai le Iuni Aukilani Samoa mo le taamilosaga o lenei tausaga 2015.
O loo taumua tutusa lelei ai ma fuafuaga ma tapenaga eseese a kalapu lakapi eseese o loo faasauni ai mo le taamilosaga o lenei tausaga. O nisi la o Kalapu e pei o le kalapu a Malisi faapea ai ma le Auckland Reds sa faataunuuina ai le la taaloga faamasani o sauniuniga lava ma tapenapenaga mo lea faamoemoe.
O lea taaloga sa faia i le malae i Otahuhu ma sa molimauina i le aoauli le tapuaiga a kalapu uma e lua sa tumutumu ai le malae i lea aoauli, ma faapea se faamatalaga o lenei taaloga o le maliliega ua masani ai kalapu lakapi nei i tausaga taitasi, ma ua saunia foi la se Ipu faapitoa e taaalo agai i ai i tausaga taitasi.
E taunuu atu le tusitala ua amata le taaloga ma sa vaaia le tapuaiga a ‘au uma e lua i se tulaga pulea lelei, leai se gase, na o le usi maimoa lava a o faafoe le taaloga e se tamalii Samoa. Ua mae‘a ma o ia o se laufali sinia foi o lenei taamilosaga i tausaga taitasi, ma o ia foi o lē sa filifilia ma Laufali o le tausaga i tufatufaga faailoga i nai tausaga e lei mamao atu.
O nei kalapu e pei o Malisi ma Auckland Reds o nisi foi ia o Kalapu faavae na latou amataina mai le Iuni a Aukilani Samoa, ma o ni Kalapu maopoopo, e iloa lava i meafai i tausaga uma.
Na mae‘a le taimi o le taaloga ona sola lea o Malisi ma le manumalo i lea taaloga. O se taaloga matagofie ma toe atoatoa i lea aso. Manuia le agai atu o nei ‘au i le amataina o le taamilosaga o lenei tausaga 2015.
