E tele lava faitioga ma faaletonu e taia ai le lagona tautua o alii ma tamaitai leoleo i soo se taimi o le galuega aemaise foi o tofotofoga ma faaosoosoga.
O nei tulaga e manaomia ai le lava taoso o tapenaga mo le faaauupegaina o se Malu o le Malo, ia faamaoni i lana tautoga o le faamalosia o le tulafono, ma ia aua ne‘i faaituau ana faaiuga.
O lona uiga ia tutusa tagata uma i lana silasila i soo se mataupu e soli ai le tulafono, amata mai i taitai o le Malo, faasolo ifo i faauluuluga o auaunaga a le Malo, aemaise o le lautele o le atunuu.
O le autu lea o se aoaoga e tapena ai agavaa ma tomai o alii ma tamaitai leoleo ua oo i se tulaga e mafai ai ona tauaveina tiute faataitai e vaaia le faatinoga o galuega pe a oo ina siitia i le tulaga faaleoleo o le satini poo le Police Sergeant.
E toatele leoleo sa auai i le aoaoga ae na totoe mai ai le to‘a 25 e aofia ai alii leoleo e to‘a 21 ma tamaitai leoleo e toafā. Ua latou maua tusipasi o se faailoga ua faauu aloaia ina ua mae‘a lea aoaoga e sauniuni ai i le taimi i le lumanai e avea ma ai ma leoleo satini.
O le saunoaga a le Komesina o Leoleo susuga Egon Keil, sa ia fafetaia ai le vasega ua faauu ona o le faamoemoe ia maua ei latou agavaa ma toe faamanatu i ai taiala e faatino ai le latou galuega.
Na saunoa foi le Komesina ma ia faailoa i le au faauu, o le latou tiute tauave o le faamalosia o le tulafono ma ia faamaoni, auā a iai le faatamala, o ia e oo atu i ai le faaiuga o le sailia o le amiotonu o o latou tiute.
O se luitau lelei lea e pei ona faaalia e se tasi o leoleo sinia sa auai i le faauuga i lana saunoaga mai i le tusitala, e tāua e faaauupega ai pea loto ma agaga ma mafaufau o leoleo i taimi uma, ina ia tausia ai pea le tulaga lelei e faatino ai le galuega.
O le saunoaga a le susuga Petelo o se tasi o le au faauu e faafetaia i latou sa nafa ma le aoaoga na ia faailoa ai i le Komesina, o latou vasega o alii ma tamaitai leoleo ua silia i le lima tausaga o le tautua faaleoleo, ma o ni tagata ua lava taoso mo le tuuina atu i ai le tulaga faaleoleo o le satini.
Sa molimauina e foliga na soisoi le toatele o le au faauu ma le au valaaulia ae na faaalia e Petelo, e lē fesiligia le tulai mai o le latou vasega o ni taitai faamaoni ma mataalia i le faatinoga o galuega pe a oo ina filifilia e tauaveina lea tulaga faaleoleo i se taimi e valaauina ai, ma pasi foi mataupu e sueina mo le ausia o lea tulaga sinia i le tautua a Malu o le Malo.
