O le malofie poo le tatau a le sogaimiti, ua avea lea o se la’ei o mitamitaga mo le tama tane Samoa moni
O le Tatau Dance Group, o se ausiva a tamalii talavou Samoa, ua tuufaatasia ona o lo latou naunautaiga ina ia avea le malofie a tamatane ua latou laeiina, e avea ma faaautū o le feau taumolimoli ma le atoaga o mamanu Pasefika ma faa-Samoa moni, o loo lauiloa ai si o tatou atunuu i le va ma isi foi aganuu, lanu ma gagana.
Ua atoa nei le 5 tausaga talu ona faafiafia ma o se ausiva ua iloga foi lona pale mai e faatinoina ma toe fafagu siva tamatane e pei o le mauluulu, faataupati ma le sāsā e faaaogāina ai le lali ma le pātē, aemaise ai foi o le teuteuina o nei siva ma taga ua loa, e ala i le faaaogāina o metotia faaonaponei.
O se faatautaiga e ui ina foliga e faigofie ae fitā foi ma lavelave lona tuufaatasiga aemaise o le taimi faaalu i vaiaso taitasi mo le a‘oina ma le faamaopoopoina o siva taitasi. E tele foi nisi o faamoemoe iloga e lē gata o Niu Sila ae o Samoa foi, ua faafiafia ai le Tatau.
E pei o le NZ Qantas Media Awards, Pasifika Festival, Teuila Festival ma le tele o isi valaaulia sa latou maua.
O se tulaga foi poo se matatia e taga ese mai ai lava le Tatau Dance Group nai lo le tele o isi aufaafiafia, ona o le laei tamatane faa-Samoa moni o loo laeiina e alii uma o loo auai i lenei ausiva.
O le avanoa faaauro ua tapena atu i ai le ausiva a le Tatau e ala i le faalauiloaina o tu ma aganuu a Asia ma le Pasefika i Shanghai i le atunuu o Saina, e faia lea i le amataga o Novema. O se moemitiga sa avea ma tumutumuga o fuafuaga ma faamoemoega a le Tatau.
O le taimi nei o loo alo atu le ausiva lenei mo a latou sailiga seleni mo le faatupeina o lenei faamoemoe, e pei o le Aso Toonai nei i Manukau aemaise isi a latou faafiafiaga o loo alo atu i ai i le aai o Waitangirua i Ueligitone, i le aso 5 & 6 Oketopa.
O le susuga i le alii Faatonu o loo ia faafoeina le pulega o le Tatau Dance Group, o le susuga lea ia Aisake Akana, ma e mafai ona faafesootai i le telefoni 021 885 570.
