Afioga i le Konesula ia Faolotoi Reupena Pogi ma le vasega o faafegaiga o le   fono tuufaatasi a faifeau Aukilani

Afioga i le Konesula ia Faolotoi Reupena Pogi ma le vasega o faafegaiga o le fono tuufaatasi a faifeau Aukilani

Ua faataoto mai le polokalame o le sisigafu’a a Samoa i Aukilani i lenei tausaga e pei ona faamanino mai e le afioga i le Konesula o Samoa le afioga ia Faolotoi Reupena Pogi. O le tausga na te’a nei na faamanatu le Sisigafu’a a Samoa i Aukilani i le aso muamua o Iuni, e pei ona faatino ai foi le sisigafu’a i Samoa, ao le suiga i lenei tausaga ua tolo atu i tua i le aso fa o Iuni le Sisigafu’a, o le aso malolo lea o le Queen’s Birthday, ona o loo iai le faamoemoe maualuga o le Palemia o Samoa le susuga ia Tuilaepa Aiono Sailele Malielegaoi e fia auai mai ai i le polokalame o le Sisigafu’a o lenei tausaga.

O le valaaulia a le afioga i le Palemia o Samoa mai le Iunivesite o Otago i le vaiaso muamua o Iuni lea ua iai le agaga o le Palemia o Samoa o le avanoa lelei lenei e faatasi mai ai i le faamoemoe o le sisigafu’a a Aukilani.

O le pito laau a susuga i faafeagaiga poo le fono tuufaatasi a faifeau i Aukilani i lea faamoemoe, o le tapenaga o le sauniga lotu, e pei ona tofia i ai susuga i faafeagaiga ia Rev Poni Fonoti ma Rev Fetu Mika i le taitaiina o le sauniga, ao le afioga ia i le Konesula ia Faolotoi Reupena Pogi o lea fai ma fofoga o le aso e faasoasoaina polokalame.

O le afioga i le Palemia le susuga ia Tuilaepa Aiono Sailele Malielegaoi o le a saunoa i le saunoaga autu o le aso, ae o le afioga i le Minisita o tagata atu motu o le Pasifika ia Aupito Su’a William Sio o lea fai ma sui o le malo o Niu Sila mo se saunoaga autu.

O le kolisi o Kelston Girls lea ua valaaulia fapitoa e faafiafia i polokalame o le aso, ma le upu mulimuli o le aso lea ua autasi finagalo o le Fono Aoao a Samoa i Aukilani i lalo o le taitaiga a le Konesula e lafo i le failautusi, le susuga ia Manuo Failautusi Manuo, e saunia se upu faafetai mo le atunuu aemaise o le Palemia o Samoa ma le auvalaaulia o lea auai i lea aso.

O lenei faamoemoe o le a faia lava lea i le maota o Samoa i Magele i le nofoaga o loo tapuvae tasi uma iai mataupu ma polokalame a Samoa i Aukilani. O le agaga maualuga ia Samoa i Aukilani i lenei faamoemoe poo fea lava e aumau ai se Samoa e tatau lava ona ia lagonaina le taua o lea aso na uluai sisi a’e ai le fu’a o le manumalo ma avea ai Samoa ma atunuu muamua o le Pasefika na ausia lona malo tutoatasi mai pulega faakolone.