Mamalu o le atunuu sa auai i le fono muamua e faatalanoaina ai le Mau e talosagaina ai pepa o i latou ua ova aso i Niu Sila

Mamalu o le atunuu sa auai i le fono muamua e faatalanoaina ai le Mau e talosagaina ai pepa o i latou ua ova aso i Niu Sila

Talu ai ona ua faateteleina lava le tulafono i totonu o Niu Sila ua tipoti ma toe faafoi ai tagata Samoa ma isi tagata o le Pasefika i o latou atunuu, ua ova aso i Niu Sila nei, ua mafua ai ona toe lalaga se finagalo o tupu ma tamalii Samoa o loo iai lo latou silafia i le tulafono ma le faatinoina o pepa nofomau i totonu o lenei atunuu, ua tatau ona alu se savali e momoli se mau i le faigamalo a le Labour e toe iloilo ai le faatinoina o pepa o i latou ua ova aso i Niu Sila nei. E fua lea lagona i tagata ua leva ona galulue i Niu Sila ma totogi a latou tax i galuega o loo galulue ai, ma taumafai a latou pepa, ae lei tali mai lava le ofisa o femalagaa’ina ia faamatuu mai se avanoa nei mo latou e nonofo mau ai. Saunoaga le afioga ia Fuimaono Ioana William, o le tausaga e 2004 a’o tulai mai le faigamalo a le Labour sa iai foi se galuega faapenei sa faatinoina ai e ala lea i le toe iloilo o pepa o i latou sa ova aso i Niu Sila, lea sa maua ai foi le avanoa sa maua ai nofomau a isi foi tagata.

I le taimi nei ua leai le tele o avanoa sa faafaigofie ai ona apalai pepa nofomau o tagata, ae pau le avanoa o loo iai o le tagata ua iai lana paaga e mafai ai ona fai ona pepa nofomau, ma o le mafuaaga foi lea ua faavavevave ai na fai taitoalua o isi tagata ona o le taumafaiga lava o pepa nofomau.

O loo iai foi le Quota e o mai ai isi tagata ae pau le faafitauli e lē o mafai ona o mai uma tagata e 1,100 lea e manuia i tausaga taitasi, o le fesili la o loo tulai mai, Aisea le mea e lē faaaogāina ane ai ia avanoa mo tatou tagata ia o loo ova o latou aso i Niu Sila e aumai ai se nofomau e faatumu ai lea avanoa.

E talitonu e faapena foi isi tagata o nisi atunuu.

O le mau ua fuafuaina nei na toatele ai le mamalu o le atunuu sa auai atu i le fono muamua lea sa faia i le po o le Aso Faraile i le fale faafiafia o le Tausala Club i Magele faasoa ai ma faailo ai le auivi ma le tāua o lenei faamoemoe ua fuafuaina e nei tamalii o le atunuu auā se manuia mo tatou tagata uma.

O susuga i faafeagaiga ma o latou faletua, o tina ma tamā matutua seia oo lava i fanau ua auai atu e lagolago lenei polokalame, ae ua oo foi i tagata mai Fiti sa tuu atu foi lo latou tau’au e opogi faatasi ai le mau e pei ona faatuina. E tele finagalo faaalia mai lanu ma gagana eseese sa auai, ae tasi lava le auga o aute o nei finagalo uma, ia vave ona momoli lenei mau i le malo auā o loo maua lava o tatou tagata ma tipoti i Samoa aemaise foi isi tagata o le Pasefika.

O le fuafuaga ua taoto nei i le feiloaiga muamua a le atunuu, ua filifilia ai le komiti faafoe e faamautuina manatu o le atunuu, ona savalia muamua loa lea o le afioga i le Minisita o tagata atumotu o le Pasefika ia Aupito Su’a William Sio i sona finagalo poo sana fautuaga e ala i lenei mau ua fuafuaina e tagata Pasefika. O le toatele foi o i latou sa auai sa saini uma o latou suafa i le api e fai ma pine faamau o le lagolago o tagata i lenei Mau o le a tuuina atu i le malo.

Comments

comments