Ua iai nei se fuafuaga faataatia mo puipuiga mai le faama‘i o le Ebola ua saunia e le Matagaluega o le Soifua Maloloina, ua faamaonia e le Kapeneta e avea o se fuafuaga e tapena lelei ai le atunuu i le faaono ulufale mai o lea faama‘i ua atuatuvale ai le toatele i le aave mai o ona tala i le toatele o tagata ua maliliu ai i atunuu i Sisifo o Aferika.
O se fuafuaga ua faaalia ai i se pepa o faamatalaga mai le Malo: Afai e masalomia le aafia o se tagata i le Ebola i totonu o Niu Sila, Ausetalia ma atumotu lalata mai i Samoa, pe afai foi o le a faateleleina le aafia o tagata i totonu o Amerika i lenei faama‘i, o le a siitia loa tulaga faatinoina mo le puipuiga i totonu o Samoa i le Vaega Lona Lua o le Puipuiga e pei o o nei:
• Tapunia uma o malaga a vaalele tuusa‘o mai i Fiti
• Faaitiitia malaga mai i Amerika Samoa
• Faaititia malaga tuusa‘o mai Ausetalia ma Niu Sila
• Faaono taofia le malaga a le vaa tuusa‘o mai Hawaii mo Samoa
• Tapunia le Falemai i Faleolo i le faaaogāina e le atunuu ae ua tapena faapitoa e faaagaga mo se gasegase Ebola e ono taunuu mai i Samoa
• Siitia le mataituina o vaa e taunuu mai i o tatou uafu
• Faamalosia le tulituliloaina o pasese uma sa fesootai vavalalata ma se tasi ua masalomia i le Ebola
• Tofia aufaigaluega faapitoa o alii ma tamaitai fomai, o tausi soifua, vaega au suetoto ma talavai ma auaunaga uma e manaomia. Faamalosia le aoaoina ma le tapenaina o le aufaigaluega i tulaga o le puipuiga mai i siama pipisi ma le faaaogāina o ofu faapitoa ma vailaau
E lē gata i lea o le a:
• Fuafua foi e faaaogā le falema‘i ua tapunia i Vailima, le Medcen, e taofia ma vaavaaia ai nisi e masalomia ua aafia i le Ebola, ma faia ai foi togafitiga
• O le a taofia ma nofo vaavaaia le aufaigaluega uma ma i latou na auai i le faatinoga ma sailiiliga ma le tausiga o gasegase e pei o fomai, tausi soifua ma isi, i aso e tusa ma le 28 i le falemai i le Medcen
• O le a faaono oo foi gaioiga i le Faatino loa o le vaega pito i maualuga o Fuafuaga a le Atunuu mo Faafoega o Faalavelave Matuia. E pei ona faailoa atu i se tasi o a tatou lipoti ua iai foi le tapenaga a le matagaluega o leoleo ma le soifua maloloina e siaki ai le vasega o leoleo o loo galulue i atunuu o Liberia ma Sudan ma atunuu ua oo i ai le faama‘i o le Ebola, pe afai e toe taliu mai i le atunuu.
