E to‘a 25 tama ua filifilia nei ele aukirikiti ale Malaka e masii atu i Amerika Samoa poo Tutuila e tali le valaau e pei ona faatoai mai ai se valaaulia ise ‘au mai Niu Sila e auai ile taamilosaga ale Mosooi i Tutuila. O nei tama uma na pikiina mai lea i ‘au e lua ale Malaka male Familie ina ua mae‘a le taamilosaga ale Big Bash lea sa siamupini ai le Malaka.
Ole lua tausaga talu ai, na oo mai ai lenei valaaulia ae sa ui mai lea i totonu ole taamilosaga Kirikiti ole Faasamoa moni, ile susuga ile faafeagaiga ia Poni Fonoti lea sa taitaiina lenei taamilosaga. Ae peitai ua lē fetaui ma fuafuaga faataatitia ale Faasamoa moni ma o lea na tuusa‘o mai loa le valaaulia ile aukirikiti lenei ole Malaka ina ua suipi ile Big Bash.
Ole masii ai la o lenei ‘au ile taamilosaga ale Mosooi, oloo manino mai ai, oloo faaigoa le ‘au ile Malaka ae e lē o tauaveina ose ‘au ase nuu, ae oloo fai ma sui o alo ma tamafanau o Samoa oloo faatinoina le taaloga lenei ole kirikiti Samoa i totonu o Niu Sila.
Ole Aso Tofi ole vaiaso nei 20 o Oketopa ole a tuua ai loa ele Malaka laufanua o Aukilani mo Upolu, ae ole Aso Toonai ole a tuua ai Upolu Tutuila, e taunuu la ile Aso Faraile a Tutuila, ma tapenapena ai mole amataina ole taamilosaga.
E 6 ‘au ole a finauina lenei taamilosaga, o ‘au e 4 mai Tutuila e aofia ai Tamaolemuaau mai Faleniu, Masefau, Vaitogi, faapea le ‘au e tasi mai Samoa i Sisifo lea ua valaaulia ai le ‘au malosi mai Sili i Savaii le Tanifaolevao, male ‘au e tasi mai Niu Sila le Malaka. E oo mai ile taimi na tusia ai le tatou lipoti e lei manino mai le igoa ole isi ‘au e tasi mai Tutuila e fā ai a latou ‘au.
Ile saunoaga ale susuga ia Fiu Tala Pauga o ia ole taitai malaga ole ‘au, ua savali ile lua tausaga talu ona tapenapena le Malaka mo lana malaga ile Mosooi, o toleniga ina ia lelei le fesootaiga o tama taaalo ae faapea ai foi ma ana sailiga seleni auā pasese o tama aemaise le tausiga a‘o iai i Tutuila.
Ole susuga ia Ben ma lona faletua o le pule o le Club Royal sa tuu mai lo laua tauau e fesoasoani ai ile malaga, e ala lea i siva sa faia ile fale faafiafia. Ae o le susuga ia Shiu Singh ole pule ole Henderson Cars na tauaaoina togiga e 3 mole ‘au faatasi ai ma lana meaalofa tupe e $5000.00.
Ua saunia foi ele komiti ole tapenaga ale Mosooi fale i Tutuila e api tasi ai le ‘au pe a taunuu. Ile faagasoloina o taaloga e alu faataamilosaga ‘au uma e ono ole ‘au lava e mae‘a ane le taamilosaga oloo tele ona manumalo, ole ‘au lava lea ole a sola male siamupini.
Ole taamilosaga lenei ole Mosooi ua leva ona faagasolo i Tutuila ona pikiina mai ai lea o ‘au nei e fā, faatasi ai ma ‘au taitasi mai i Samoa i Sisifo ma Niu Sila e saili ai le siamupini.
Faailoa e Fiu Tala Pauga a a‘e manuia le taumafaiga ale Malaka i lenei faamoemoe o lona uiga ole a toe masii foi ile tausaga fou auā le puipuiina ole siamupini.
