O le sailiga tupe lenei sa faatautaia e tupulaga uma o le Sinoti Samoa Metotisi Koneferenisi Niu Sila, sa faaigoaina o le “Benefit Concert”. Ma o le Aso Toonai ua mavae, aso 31 Mati 2012, sa faatautaia ai lea sailiga tupe, ma sa auai le itumalo o Aukilani ma Manukau.
E to‘a 10 aulotu sa faafiafia ma auai i lenei aso: Birkenhead, Waitakere, Oratia, Ponsonby, Panmure, Otara, Manurewa, Mangere East, Mangere Central, ma Papatoetoe.
Sa faia lenei faafiafiaga i le Hall a Metotia Fou i Papatoetoe. Sa saunia e tupulaga talavou taitoatasi a latou itema e lua, faatasi ai ma le latou Siva Samoa. Sa matagofie lava sauniga a vaega taitasi.
Sa faaali ai ni taleni a tupulaga uma, faapei o le siva a Michael Jackson sa saunia mai e Oratia, o se pese Aferika na faia e Panmure, faapea foi pesepesaga sa faia e Mangere East. E lē gata i lea, sa matagofie foi le po i sāsā ma faaevagelia na saunia e isi tupulaga talavou.
Sa valaaulia foi le kulupu faafiafia a alii talavou, le “Dee-licious” sa faia ai le latou sao mo lea po. Sa auai foi le group a “Church Boiz” ma faia foi ni la pesepesega.
O le ulufale i le Benefit Concert sa tuu lava i le manaoga o le tagata, ae sa amata mai lalo i le Gold Coin Donation.
O le tupe sa latou mauaina i le faitotoa e $972.80, ae o le tupe aofai sa mauaina i lea po e $10,002.20. Lagona le fiafia o le afioga a le Sea ia Tovia Aumua i le lagolago o ekalesia taitasi aemaise uo ma ē masani i lena po.
O le uiga o lenei sailiga tupe, ia feasoasoani i tupulaga talavou mo se agai i luma o le olaga. Ua amata ona tapena se Educational Expedition (EXPO) e fesoasoani i tupulaga mo so latou lumanai.
O vaega o le a auai i le EXPO o ni sui vaega mai Universities ma Polytecs eseese, faatasi ma ni lala o galuega faapei o le leoleo, fomai, faiaoga…, o le aso 19 Me 2012 o le a fuafua e fai ai le EXPO o le tupulaga talavou Sinoti Samoa i le Allan Brewster Recreation Centre i le alofa o le Atua.
