Ua tatala aloaia ai nei le amataga o faaga ile tai, o folauga a Vaafaila taututuu laiti ile kalapu o Folauga i Mulinuu, Apia Yacht Club.
Na talanoa ai le tamaitai o taulamua ile toleniga o fanau e a’oa’o ona folau, Raema Von Richey, e tele lava vaega e tatau ona ave iai le faamuamua ile taimi nei.
O ia itu, e aofia ai le mata’itu lea ole nofoaga ole a faia ai le tuuga vaafaila, ile taimi ole Taaloga. Talu ai, sa iai lava faanoanoaga ile mamao tele ole nofoaga na faia ai taaloga ole 2007. I Mulifanua i talane ole faletalimalo o Aggie Grey.
Peitai ua avatu le talosaga ile komiti o taaloga ole tausaga fou, mole faia lea ise nofoaga ile taulaga, pei ole atufagaloa i Vaiusu. Ole taaloga lenei e tele tagata e fia matamata iai, ma talosia ia avea ai le suia ole nofoaga e faia ai ile tausaga fou, ma se tasi o auala e faatosina mai atu iai le aumaimoa.
Ua iai le fuafuaga mamao, e amata ona faia toleniga ale au folau, ile fagaloa lea o Vaiusu amata atu ile vaiaso fou, e le gata ina ole a faamasni ai i ala ole savili ma tafega o au, ae ole iloa tonu ai o vaega papa’u ma loloto o lea aloalo.
E talitonu, e tele se vaega loloto ole aloalo, talu mai taimi na mimiti mai ai e palolo le asuemu mo galuega atinae sa faia ile tele o tausaga ua tuanai. O na masini na leaga ma pala ifo ai lava, peitai e lē o iloa tonu vaega o taatitia ai, e manaomia ona tuu iai ni maka faailoilo mo le saogalemu.
Ole a faaaogā foi fanau ua iai nei ile ‘au folau, e aooga mo le fesoasoani ile faafoefoeina ole taaloga ile tausaga fou.
E lē gata ole aumaia lea ose tagata polofesa faapitoa e faia toleniga mo le ‘au folau, ae ole aoaoina foi o tagata e faia toleniga. Na talanoa foi Raema, ile toaitiiti o tagata e iai le naunauga e folau ile vaa e igoa ole Hobie Cat, ma e lē o mautinoa ile taimi nei, le iai ose ‘au a Samoa i lea vasega, vagana ai le Vasega ole Laser, e mautinoa lava le iai ole ‘au. E lē o mautinoa foi le vasega ole windsurfer mo le taimi nei, ona ole leai oni tagata o iai le tomai faapitoa mo le faaleleaina ole laupapa faasee.
Peitai ua amata ona gasolo ane tagata o iai le fia fesoasoani, ile taimi e faafoe ai tuuga ile tai, mole komiti faafoe, e aofia ai ma fanau e le agavaa ile tuuga ole Pasefika, ole a gafa ma tiute esese, pei ole faavasegaina o fu’a eseese, o tagata mo le matafaga, o tagata mo totoga o vaa e faaletonu, o tagata e gafa ma le saogalemu o tagata tutuu, ole vaega e tiute ile matafaga, o tagata e gafa ma vaa afi e amataina tuuga ma le faatini.
Taimi nei, e tele lava ni galuega e fia faaleleia, e aofia ai ma le polesiina ole tomai faavaafaila o fanau nei. Ole tasi o tamaitai na a’o mai lana folau, ile kalapu lenei o vaafaila i Mulinuu Apia, ma oloo Kapeteniina nei le Vaa folau o Samoa le Gaualofa.
Ile aso na tatala aloaia ai le amataga o folauga o lenei tausaga, 2018, Aso Toonai talu ai, na auai atu iai le afioga ile Minisita o Aoga, Taaloga ma Aganuu, Loau Keneti Sio. Na ia molimauina le aganuu masani a tagata folau, ole faia lea ose folauga faataamilomilo ile aloalo, e amanaia ma aloaia ai le tapuaiga mai fanua.
Na afea foi lea taeao, faapitoa o tagata folau a Samoa, e le alii Amepasa o Saina, ma ia folafola le fia fesoasoani, ile atinaeina ole au taaalo a Samoa, mo taaloga ale Pasefika 2019.
