Ole tala’ina ole finagalo ole Atua ina ia soo le lalolagi ile tala lelei, ose faiva ua lologoa ai talaaga o tagata Samoa faapea le Pasefika e ala ile galuega tala’i a tuaa ua lagomau mai tiasa, ma le soifua tautua o lupe faalele ale atunuu ile tele o tausaga ua tuanai. E le fou i luga ole Samoa Times le tuuina atu lea o ripoti e faatatau i malaga faamisionare a ekalesia eseese. Ole aso 21 o Novema 2017 ole a tuua ai e le ‘au lenei ua faaigoaina ole Team Cambodia le atunuu ae malaga atu mo le galuega faamisionare. E to’a 6 le ‘au ole a auina atu nei i Cambodia ma le faamoemoe e faalauaitele le malo ole Atua ile lalolagi e ala ile latou tala’iga.
Atonu oloo tuufesili nisi o tagata poo le ā le isi itu e tāua ai nei malaga faamisionare e ese mai le faatalaleleiina ole lalolagi. Peitai, mo i latou oloo malaga i lenei malaga, ose itu tāua io latou soifuaga faalefaatuatua. Na ta’ua se tasi o ulugalii oloo malaga faatasi i lenei malaga ia Shane ma Pam Ah-You. “Ole vaega muamua ole faataunuuina lea ole poloaiga a Iesu e fai nuu uma lava ma soo, ma le lona lua, ole tasi lenei o itu tāua ile ola faaleagaga ole tagata. O lo’u foi mai le malaga muamua ile tausaga ua na te’a nei i Cambodia ua siisii ai foi le tulaga o lo’u ola faaleagaga, ua amata ai foi ona sui la’u vaai i lenei olaga ma le tatou folauga.”
“Ua ou vaai ile mea e ta’u ole mativa i nei atunuu matou te malaga atu ai, e le mafai ona faatusa iai le leai ose meaai ise aso se tasi pe lua i Niu Sila nei.” “Ole tasi itu ile vaega oloo matou agai atu ai, ua o matou iloa ai o nei atunuu latou te manaomia le malamalama o Iesu. Ole tele o nuu ua lē mafai ona ola saoloto tagata ile fefefe ile au faivai faataulaitu ma faiga faatemoni.”
“Ole vaaia ole galue ole Agaga ole Atua e tauala atu ia matou galuega fesoasoani ma le mana o lana upu, ua faasaoloto ai le toatele na mafai ona o matou faasusulu atu iai le malamalma o Keriso i totonu o nai vaiaso na matou aumau ai i lea nuu.”
Ose tasi o itu tāua ile galuega faamisionare e pei ona ta’ua e Shane ma Pam i misiona na malaga muamua atu ai, ole maitau mai lea a tagata ia i latou o tu ma aga oloo momoli atu ai le latou molimau ma le fe’au.
Oloo avatu ile lau fofoga fiafia ma le alofa, aemaise o taleni oloo faailoa atu e ala ile faatinoina o a latou galuega, ua avea lea ma mafuaaga ole tosina mai o loto o tagata ia i latou.
Ole isi itu e faatāua e lenei aumalaga mo Cambodia ole faatāuaina lea o tagata i soo se tulaga oloo iai ma taumafai e faasoa iai le malamalama o Keriso. E ta’i $1500 tala Niu Sila le tau ole pasese ole alu ma le toe foi mai, ose misiona oloo tuufaatasi ai le to’a 5 mai le Ekalesia Life Church i Manuwera ma le Sui e toatasi mai le ekalesia Peace Chapel i Magele. E toe tasi le vaiaso atoa ole latou tapenaga oloo totoe a’o lei malaga atu ile Aso Lua ole vaiaso asau mo le latou misiona.
Na ta’ua ele Susuga ia Shane le tāua o talosaga molia mo le latou faigamalaga ina ia puipui i latou e le Atua mai faama’i ma ni faalavelave e ono aafia ai. E 14 aso ua fuafua mo le faigamalaga, ose misiona tāua auā le sosooina ole Talalelei ale Atua ile lalolagi.
