O nisi o sui ole Malo ma Pulenuu na auai ile sailia o finagalo e fausia ai se faiga faavae e puipuia ai le saogalemu o Samoa ma ona tagata

O nisi o sui ole Malo ma Pulenuu na auai ile sailia o finagalo e fausia ai se faiga faavae e puipuia ai le saogalemu o Samoa ma ona tagata

“Ua tatau ona saili ni fofo ole tele o fesootaiga faaonapo nei ua lepeti ai le filemu o aiga, nuu, ekalesia ma le Malo”

E felanulanuai finagalo na sasaa ile faatasiga faalauaitele ale atunuu na faia i Upolu ile Aso Faraile ua mavae ile naunautaiga ole Malo e saili ni finagalo e fausia ai se Faiga Faavae mo le puipuiga o Samoa (National Security Policy).

Ile aotelega o lenei fuafuaga ua faaalia ai ise pepa faalauiloa e faapea o suiga ua iai nei le lalolagi i feoaiga a tagata, fesootaiga faaneionapo, suiga ole tau, faama’i ogaoga, afā, mafuie, lologa ma isi faalavelave tutupu, ua aafia ai atunuu uma e aofia ai ma Samoa.

“Mo Samoa lava ia, ose atunuu laititi e tele le aafiaga o nei suiga i lona saogalemu, siosiomaga, o ona tagatanuu ma lona tamaoaiga. E tāua ai le malupuipuia o tuaoi faavaomalo, ma ia mautu taiala ma auala e tali atu ai i faafitauli e tutupu mai e lamatia ai le saogalemu ole atunuu”.

O fesootaiga faaneionapo ose tasi lea o vaega na mamafa iai finagalo faaalia o nisi o sui ole Malo ma Pulenuu faapea sui o tamaitai auā o latou ia na lilifa iai i latou na auai ile faatasiga.

O fesootaiga o telefoni feaveai ua manatu nisi e ao ile Malo ona faia iai se fuafuaga talafeagai ona ua saveu le filemu o aiga, nuu ma ekalesia i lona faaaogāina.

Fai mai nisi o sui e sili ai le toe foi i telefoni laina sa tele ina faaaogā ele atunuu auā e vili atu se tagata e manao ise isi ole fanau oloo iai mātua ma tagata ose aiga latou te silafia ai se gaioiga ole a tupu.

Ose tasi o tamalii le susuga Papalii Tusimona Tinai sa tautua ile Matagaluega o Leoleo i tausaga e tele ae ua malolo litaea na ia faaalia le tele o mea ua tutupu mai i tupulaga talavou ma fanauiti ona o telefoni feaveai.

Oase tasi o fesootaiga faaneionapo na tautalagia tele i finagalo faaalia ole facebook. Ua ilitata iai lagona o nisi o tina ma tama matutua sa auai ona ole latou molimau ua tele vevesi ua tutupu io latou nuu ona o lea auala o fesootaiga ma ua tatau ona silasila iai le Malo ise faiga e faatonutonu lelei ai lona faaaogāina.

Ole isi mataupu na tele iai lagona faaalia ole tulaga i tagata Samoa sa solitulafono i isi atunuu ma tuli ai ni faasalaga ile falepuipui ae ua toe faafoi mai i Samoa.

E manatu nisi e leo se faiga lelei lea aua o tagata sa solitulafono i fafo e mafai ona latou faia nisi solitulafono foi e lei oo mai i Samoa ma avea ose isi faitotoa e pisia ai olaga o fanau ma tupulaga i Samoa aemaise e lepeti ai le nofo filemu ma le nofo lelei o tagata.

Sa fesiligia le Ofisa Sili ole Matagaluega ale Palemia ma le Kapeneta le tofa Agafili Shem Leo o ia na taiulu ile faatasiga sa tapenaina ele latou matagaluega e tusa ai ose mafuaaga ua a’e ai se finagalo ole Malo e fausia se faiga faavae mo le puipuiga o Samoa. “E le mafai ona avatu se faamatalaga ona o lea faatoa amata faatalatalanoaga faalauaitele male atunuu”.

E ui sa lē mafai ona ia taliina ni fesili ale tusitala ae sa ia saunoa mai ose taimi poo le masina o Iuni ole tausaga nei ole a mafai ona faamaopoopo ai se lipoti ona avanoa lea ona faia se faamatalaga faalauaitele. E pei ona silafia le fesootaiga OlePalemia poo OLP lea oloo ilitata iai le Malo ona o ana faasalalauga malolosi oloo faitau ai le lalolagi o tagata Samoa.

Ole isi lea fesootaiga ua avea nei ma faatupu vevesi e pei ona molimauina i finagalo faaalia ole taitai ole Malo ini feiloaiga ma tusitala faatatau ile toe aumai ole tulafono e molia ai ni tagata e faia ni faasalalaugatau faaleaga.

O Upolu na taualuga iai faatalatalanoaga ma le sailiga o finagalo ole atunuu auā ole motu o Savaii na muamua faatino ai le faamoemoe.