Tasi le faafitiga i Melepone o le Fono Faufautua o le a tapenaina le Tutoatasi 2014
Ua faitau vaiaso nei talu ona faasalalauina i luga o auaunaga leitio faapea galugalu o le ea le sauni atu o le Fono Faufautua mo tagata Samoa i Vitoria, latou te tapenaina le faamanatuina o le tutoatasi o si o tatou atunuu faapelepeleina o Samoa, mo le paia ma le mamalu o avea Melepone ma o latou nuu e aumau ma saili malo ai.
O lea ua faamatuu mai e le Fono le polokalame atoa o le faamoemoe mo le faalauiloaina auā le silafia o le paia lautele o le atunuu i soo se tafa o le lalolagi, o le Aso Gafua, 9 Iuni o le a faataunuuina ai le Sisigafu‘a, amata i le itula e 11 i le taeao seia oo i le 5 i le afiafi. Ua mautinoa nisi o malo faaaloalogia o le a auai ai, e pei o sui o le malo setete o Vitoria, faipule o itumalo o loo toatele le mamalu o le atunuu o afifio ai, aemaise o faipisinisi o tautuaina si o tatou atunuu. O loo tālia pea se faamaoniga mai le sui komesina o Samoa i le aai o Canberra.
O nisi o aufaafiafia o le a fai ni o latou sao mo le silamaimoa i le aso o le a aofia ai le Tama tatau, Nesian Pearl, Sons of Samoa ma nisi o Ekalesia Samoa, o le a lē patino le sauniga lotu i se Ekalesia se tasi, ae ua tasi le finagalo o le Aufaigaluega o loo lagolago ma tautua i le Fono, o le a o latou galulue faatasi mo le sauniga paia i lea aso, ina ia silafia ai e le atunuu le tasi o le tofa faale-Atua i le Aufaigaluega e ui lava ina eseese Ekalesia ma tapuaiga o loo valaauina ai.
Ua finagalo le Fono e faataunuu le Aso tele i le Aso Gafua lea, ona o le aso malolo lea o le Queens Birthday, e ono maua ai avanoa o le toatele o le mamalu ma le paia e afifio ma talaaao atu ai e patipatia ma molimauina le Tutoatasi. Tau ina ia tau lau o le faamoemoe ma aulia i le soifua manuia o le atunuu lautele.
