E lei tafa ata o le taeao o le Aso Toonai na tea nei ae ua tumutumu nisi o tauaiga, ekalesia, uo ma paaga ma nisi o le mamalu o le atunuu i le malaevaalele i Brisbane e faatalia le taunuu mai o le Tausala Samoa le tamaitai o Ariana Taufao, sa fai ma sui o Ausetalia lea ua pale mai i le Miss Samoa 2015-2016.
Sa auai foi le faafaletui a le Tofa Saili lea o loo peresetene ai le tofa ia Patea Taefu i le faataliga o le Miss Samoa, lea sa malaga mai ma nisi o le komiti faapea le susuga i le faafeagaiga ia Rev Lisatisone & faletua ia Faitauga Taufao.
Na lagona le agaga faagaeetia o nai ona mātua faapea le ekalesia aemaise le Komiti a le Miss Samoa Ausetalia ina ua pale mai le tamaitai o Ariana i le tofi aemaise lava si ona tina matua o loo soifua mai le Tina matua ia Lesa Taufao.
E lē o toe po se lilo o lea ua malaga mai le Tausala mo le lua vaiaso e tapena atu ma se‘i faamanuia atu foi nai ona aiga aemaise le tapuaiga a Kuiniselani ona toe tuuvaa atu lea e faataunuu lona tofi o le Tausala Samoa Miss Samoa mo lenei foi paeaiga.
Ua faamoemoe o le a alo atu le Komiti aemaise o le tapuaiga a Kuiniselani i se fiafia tele e taumavae atu ai ma le Tausala i nai aso o lumanai a o lei toe tuuvaa atu mo Samoa.
O le Faatonu o le Miss Samoa Ausetalia, o le tofa ia Talevu Koleta Galumalemana, ma le Komiti, afioga ia Muliagatele Filipina Petelo, tofa ia Patea Pesamino & Tina Taefu faapea le komiti.
O tuaa o le Tausala Samoa o si ona tamā o Fepuleai Samuelu ma le faletua ia Taupule Taufao (Faleasiu, Salamumu, Fogapoa, Satapuala & Foalalo).
O le tamaitai ua avea nei ma Tausala o Samoa, e auai ma si ona aiga i le Ekalesia Worship Centre i Lawnton. Sa auai mai ai foi le faaao o le Ekalesia mai Samoa, Ps Viliamu Mafo‘e. Ia manuia lou tulai mai i le tofi o le Ariana Taufao!
