Tapena Aoga Maualuluga ile Sailiga Siamupini ole Taaloga Lakapi 2018

Siamupini Sone B U19, Sagato Iosefo
Siamupini Sone B U19, Sagato Iosefo

Ua taualuga ai nei le taamilosaga lakapi mo Kolisi Maualuluga i totonu ole atunuu mo sone taitasi e pei ona faaiu ai ile vaiaso na tea nei. E pei ona silafia ole taamilosaga lakapi 15 mo fanau aoga na faatautaia ai mo sone taitasi ile itupa o alii faapea foi ma le itupa o tamaitai. E fā sone eseese na faagasolo ai taaloga nei mo le fanau aoga e pei ona vaevaeina iai kolisi ale malo faapea ma kolisi a Ekalesia. Ole faaiuga la lenei na iai taaloga mo Sone taitasi.

Ile Sone A mo le vaega o i latou e i lalo ifo ole 15 tausaga le matutua poo le Under 15’s ua siamupini ai le Kolisi o Samoa ae tulaga lua ai le Kolisi o Avele. Ile vaega ole 17 tausaga le matutua poo le Under 17’s ua siamupini ai nei le Kolisi o Avele ae tulaga lua iai le Kolisi o Leifiifi. Mo tama matutua poo le Under 19’s ua suipi ai nei le Kolisi o Vaimauga ae tulaga lua ai le Kolisi o Leifiifi.

Ile faaiuga na iai taaloga mo le Sone B mo i latou e i lalo le 15 tausga le matutua na siamupini ai le Kolisi o Saint Josephs i Alafua ae tulaga lua ai le Kolisi o Maluafou. Ile Under 17’s Boys na manumalo aoao ai le Kolisi o Saint Josephs ae tulaga lua iai le aoga a Robert Louis Stevenson. Mo le Under 19’s na sola ai ma le Kolisi o Saint Josephs le siamupini ae tulaga lua ai le Kolisi o Maluafou.

I taaloga ale Sone C mo Kolisi Maualuluga ile motu tele i Savaii na manumalo ai le Kolisi ole Itu o Tane mo le vaega e i lalo ifo ole 15 tausaga le matutua ae lona lua iai le Kolisi o Palauli. Ile Under 17’s na siamupini ai le Kolisi o Amoa ae tulaga lua ai le Kolisi o Vaiola, ma le vaega o tama matutua poo le Under 19’s na suipi ai le Kolisi ole Itu o Tane ae tulaga lua ai Uesiliana. Ae mo le itupa o tamaitai ile Under 19’s na manumalo ai le Kolisi o Palauli i Sisifo ae tulaga lua iai le Kolisi o Palauli. I taaloga mo le Sone D mo i latou e i lalo ifo ole 15 tausaga le matutua na manumalo ai le Kolisi o Nuuausala ae tulaga lua iai le Kolisi o Lefaga. Mo i latou e i lalo ifo ole 17 tausaga le matutua na sola ai ma le Kolisi o Leulumoega Fou le manumalo ae tulaga lua ai le Kolisi o Safata.

Kolisi o Vaimauga siamupini Sone A U19
Kolisi o Vaimauga siamupini Sone A U19

Ile Under 19’s na suipi ai le Kolisi o Wesley ae tulaga lua ai Leulumoega Fou. Ae ile itupa o tamaitai matutua poo le Under 19’s na manumalo ai le Kolisi o Leulumoega Fou ae tulaga ai le Kolisi o Aana No 1.

E lima vaiaso na faagasolo ai taaloga nei ale fanau aoga e pei ona molimauina le tumutumu ai o malae lakapi ile toatele o mātua e aga’i atu e lagolago le fanau i vaiaso taitasi. Ole aso 16, 18 ma le 20 ole masina lenei ua faatulaga mai ai e faataunuuina ai sailiga siamupini a aoga ua lautogia mo vaega taitasi ile malae taalo ole Apia Park.

Ole uluai tausaga lenei ua faia ai sailiga siamupini nei mo Kolisi Maualuluga ale atunuu lea e saili mai ai ‘au e lua pito i luga poo Top 2 Teams mai i Sone taitasi. E lei leva talu ai nei sa faataunuuina ai le sailiga siamupini ole taaloga ole taitoafitu a’o lenei ole a sosoo ai ma le lakapi 15.

Ose tasi o suiga tele ole taamilosaga lakapi lenei ale fanau aoga ina ua faatautaia ai e le Iuni Lakapi faatina ale atunuu. E iai foi le talitonuga ole Iuni Lakapi a Samoa ole a telē se manuia ole lakapi ale atunuu e maua mai i fanau nei ile lumanai ona ole alafua ua faataoto nei e faagasolo iai taaloga ale fanau aoga mo lenei tausaga. Ole toatele foi o aoga maualuluga e finau ai i taaloga a Sone taitasi ma le naunautaiga e saofaga atu ai ile taimi o sailiga siamupini.

Ole tauaaoina ole faailoga ole siamupini ole U19 ile taamilosaga a tamaitai
Ole tauaaoina ole faailoga ole siamupini ole U19 ile taamilosaga a tamaitai