Tapatautali i lau Gagana ma lau Aganuu

Auā a a‘oa‘o, faasino ma faatonu le tama e tusa ma ona ala, a oo ina matua e lē toe tea ese ai lava a o le upu faa-Samoa: “O le tagata ma lona tupuaga, o le tagata foi ma lona faasinoga”,

O le fotuagagana faasamoa lea sa fai ma vaaiga ma taiala o le faamoemoe na saunia lelei ai e le aiga faiaoga le fanau laiti e ala ia latou polokalame o aoaoga faaauau i totonu o le aoga amata a le Mataniu Feagai ma le Ata i Magele i Sisifo.

O le Aso Tofi na se‘i mavae atu na faataunuuina ai i le hall a le Ekalesia Faapotopotoga Kerisiano Samoa i Magele i Sisifo i Aotearoa Aukilani le faaaliga taupou a le fanau, o le pale lea o le faamoemoe na a‘e ai le tofa i le vasega o faiaoga ma lo latou taitai auā lava le naunau e fia faalauteleina pea le malamalamala ma le vaaiga faaauau a fanau i le faatinoga o le avea ai o i latou o tamaitai ma taupou aemaise o tama/taulelea e fai ma manaia.

Na saunoa le tamaitai puleaoga le Susuga Sauilima Lokeni-Siaosi, na amataina lava ona faaaoao ma faailoa i fanau le lalagaina o le ietoga ma ona vaega uma i se vaitaimi ma na maitauina ma vaaia ai foi le fiafia tele o tamaiti e sisiva, ona faapena foi lea ona taa‘ina le polokalame faaauau faaleaoaoga i le faasinoga ma le aoaoina o le siva a le tausala, seia oo ai lava ina oo mai vaitau o le faatāuaina o le faaaogāina o le gagana Samoa ma faamautuina ai loa le mau ina ia taualugaina le aoaoga a le fanau i se faatinoga.

O lea la na faatumulia ai le maota o le galuega a le Ekalesia EFKS a Magele i Sisifo o loo tausia e le Susuga i le Faafeagaiga ia Petaia Finau Lokeni ma le faletua ia Seira Lokeni, i le mamalu o mātua ma aiga i le molimauina o lenei faamoemoe auā lava le lagolagoina o aoaoga faaauau a nai alo ma fanau o le aoga amata.

O le faasologa o le polokalame, sa faamalosia ai lava le faaaogāina o le gagana Samoa e tautatala ai tamaiti ia latou tauloto, o pesepesega, o le faatalofa ma fesili i le taimi o faatalatalanoaga (interviews) o taupou uma.

Saunoa foi Sauiluma o se polokalame na maitauina ma vaaia ai le loimata maligi o mātua, o tina ma tamā matutua (grandparents) aemaise le paepaega o tagata lautele na faailoa ai lagona o le faagaeetia, o le mitamita e tusa ma le vaaiga ma le faafofoga i le agavaa o fanau ia latou faatinoga.

O le manatu autū o lenei faamoemoe, ina ia faaauauina pea le tapueina o le olaga aoaoina o alo ma fanau Samoa o loo soifua a‘e i totonu o Aotearoa, Niu Sila; auā le faatāuaina o a latou measina e pei o le gagana Samoa, tu ma āga e pei o teuga faa-Samoa i le tino, mafaufau ma le agaga.

O tamaitai sa  laeiina teuga a le taupou; ae o tama o loo laei le siapo ma le ulafala