Taoto mai le ata o galuega lelei mo le Maota o Samoa i Magele

IMG_2966Ua tino mai le galuega o le Maota o Samoa e pei ona faatinoina i Magele. O lea galuega tele sa amata mai i le amataga o lenei tausaga e pei ona faapaiaina ai le laueleele e faatu ai le fale ma amata ai loa ona eli le faavae ma fausia ai fale e pei ona fuafuaina.

E pei ona silasila i ai le mamalu o le atunuu i lenei galuega, o ni fale tetele ua saunia mo tatou tagatānuu Samoa auā ana galuega faatino aemaise o le maota o Samoa o loo galue ai le Konesula o Samoa i Niu Sila nei.

I le feiloaiga a le sui o le Samoa Times ma le afioga i le Konesula, Faolotoi Reupena Pogi, na fesiligia ai se taimi e ono mae‘a ai le galuega, ae na saunoa le afioga le Konesula, o Mati i le tausaga fou 2016 o loo fuafua e mae‘a ai lenei galuega tele, auā o nei galuega o loo faatinoina lava ma fuafua i tulaga o le fesuisuiai o le tau.

O le faaiuga o Fepuari i le tausaga fou sa faatulaga e tatau ona mae‘a ai, peitai ua tuai nisi o galuega ona o le tau, ma ua taoto atu ia Mati e tatau ona faamae‘a ai.

O loo sologa lelei ma manuia mea uma e leai foi ni faafitauli o tulai mai, ma ua iai le talitonuga o lea o le a oo mai le tau mafanafana e tatau ona vave ai lenei faamoemoe. Ua mae‘a foi ona asia e le afioga i le Palemia o Samoa ia Tuilaepa Sailele Malielegaoi le galuega ma ua faaalia ai lona agaga fiafia ina ua ia maitauina le matagofie ma le aulelei o le tutū mai o maota ua fuafuaina mo galuegafai a le atunuu.

Aemaise o tatou tagata ua iai le lagona fiafia ua lata ma sailigofie paka o taavale pe a afea le maota o le Konesula mo se mataupu. Ua uma ai le fa‘atu e saili tupe e totogi ai le paka.

Saunoa le afioga Faolotoi Reupena Pogi ua toatele nisi o faipisinisi ma kamupani o le atunuu ua faatoai atu ni avanoa e fia faaaogāina ma lisi ai le fale fogatolu i le pito i tua pe a mae‘a, ma ua tapena ai i le taimi nei, auā o le fogafale muamua ma le lua o le a fuafua mo manaoga o tagata faipisinisi ma kamupani, ae o le pito i luga poo le fogafale tolu ua faataoto mo le ofisa o le Konesula ma nisi ofisa o le Malo o Samoa.

O le fale Samoa i le pito i luma ua fuafuaina i ni mea e fai mo le komuniti ma ua iai foi ni aiaiga mo lea maota. O loo vaai foi poo ai ni faalapotopotoga e fia faaaogāina o le a fuafua lava i ai le totogiina, auā nisi tupe maua mo le atinaeina o galuegafai a le malo.