E toatasi le alo ole ulugalii o Sili ma le tina o Kolopa Filiga o Salamumu ma Vailele, ua na‘o le atalii o Paul Filiga 5 tausaga le matua. O lona tuputupu a‘e ina ua fanau e lei iloa ni gasegase faigata ole a aafia ai.
“Na vaaia ua fula lona fatafata ma matou o mai loa ile falemai se‘i vaai se fomai ae faailoa mai ai ole ma tama e maua ile fiva rumatika ma ua aafia ai lona fatu,” ole faamatalaga lea ale tina o Kolopa.
Ua savali ile lima masina o taofia ile falemai o tamaiti ile maota gasegase i Motootua. O lea taimi atoa sa mafai ona vaaia ai e fomai i Samoa ma se fomai o gasegase ole fanau mai Niu Sila, ma ole fomai lea na ia tapenaina le ave o Paul e taoto lona fatu i Niu Sila.
“E lē faigofie ia ma‘ua o mātua le tala na aumai auā e tasi lava si a ma tama ua na‘o Paul, ae sa ma loto tetele lava i fautuaga a fomai aemaise o si matou faifeau”.
“Ole fiva rumatika ose tasi o gasegase e tatau ona vave togafiti ai alo ma fanau auā a tuai, o lona taunuuga ole aafia ole fatu,” ole faamatalaga lea ale tamaitai fomai o Dr Magrath ina ua talatalanoa iai ile falemai ile aoauli ole Aso Sa na tea nei ina ua oo atu le taitai ole faalapotopotoga ole Little Angels le susuga Taa ma le faletua o Ima ma nisi o sui ole faalapotopotoga e tauaao se seleni ile tina ia Kolopa e fesoasoani ai ile tapenaina ole tuua o Samoa mo Niu Sila ile po ole Aso Gafua na tea nei.
“Oute lagona i lenei taimi e faatauvaa lava le faalapotopotoga ole Little Angels ae faafetai ia i latou sa agalelei mai ua iai se seleni ua mafai ona matou fesoasoani atu ai ile gasegase ole atalii”.
Na saunoa le susuga Taa ma ia faailoa lava ole taimi muamua na asia ai ele faalapotopotoga le atalii o Paul, sa latou foai foi se seleni e fesoasoani ai ile tausiga ole atalii a‘o iai ile falemai.
Ua toe faaopoopo le agalelei o Taa ma le Little Angels ile faatupeina ole pasese ole tina ia Kolopa ma le visa o Paul. Ole faafetai tele lea mai mātua o Paul ona ole agalelei ole faalapotopotoga ua laveai atu i taimi faigata ile itu tau tupe.
Ole Malo o Samoa ua na totogiina le taotoga atoa ole atalii lea na faaalia ese sui sooupu ole Little Angels e $33,000 tupe Niu Sila le tau ole taotoga.
E manaomia ele tina o Kolopa se fesoasoani a lo tatou atunuu i Niu Sila a‘o iai i atunuu ese mo le siiga gasegase.
Ole tatalo foi lea ale Little Angels ise fesoasoani e mafai ona tuuina atu mo le tina ma lona alo a‘o iai i Niu Sila.
